Diskutimi i parë publik mbi prioritetet për investime kapitale në kuadër të Kornizës afatmesme buxhetore 2025-2027 u mbajt në Shtëpinë e kulturës në Kishnicë për banorët e këtij vendi si dhe ata të Sushicës, Badovcit të ri dhe anëtarëve të këshillave lokale të komuniteteve pakicë. Diskutimi i dytë publik për banorët e Uglarit dhe Batushës nuk u mbajt për shkak se asnjë nga banorët e këtyre dy vendeve nuk u paraqit në diskutim.
Draftbuxhetin për vitin e ardhshëm, si dhe projeksionin e Kornizës afatmesme buxhetore 2025-2027, e prezantoi drejtori për Buxhet dhe Financa, Sllavisha Niçiq. Në konsultimet publike në Kishnicë morën pjesë edhe drejtoresha e Drejtorisë Komunale për Urbanizëm dhe Planifikim Hapësinor, Alleksandra Gjekiq, drejtori i Drejtorisë Komunale për Shërbime Publike, Vlladica Trajkoviq, drejtoresha e Drejtorisë Komunale për Arsim, Brankica Niqiq, drejtori i Drejtorisë Komunale për Zhvillimin Ekonomik, Nebojsha Millovanoviq, kryesuesi i KK të Graçanicës, Millan Dimitrijeviq dhe nënkryetari i komunës së Graçanicës, Leutrim Ajeti.
Banorët e Kishnicës, Sushicës dhe Badovcit të Ri theksuan si aktivitete prioritare përmirësimin e infrastrukturës, e cila përfshin ndërtimin e kopshteve, modernizimin dhe vendosjen e ndriçimit në pjesë të këtyre vendeve.
Banorët e Sushicës, të pranishëm në diskutimin publik, kërkuan rregullimin e rrjetit të ujërave të zeza në një nga rrugët, si dhe asfaltimin e rrugës që të çon në varrezat shqiptare dhe rregullimin e hapësirës së parkimit pranë varrezave.
Në diskutimin e caktuar publik në Uglar për banorët e Uglarit dhe Batushës dhe përfaqësuesit e Këshillave lokale, asnjë nga qytetarët nuk është paraqitur, prandaj diskutimi publik nuk është mbajtur.
Diskutimi i tretë publik mbi prioritetet për investimet kapitale në kuadër të Kornizës afatmesme buxhetore 2025-2027 do të mbahet të hënën, më 12 gusht, në sallën e Kuvendit të Komunës së Graçanicës, në kuadër të takimit me përfaqësuesit e institucioneve shëndetësore nga ora 11:00, ndërsa të njëjtën ditë nga ora 18:00 do të mbahet diskutimi i katërt publik në Lepinë në shkollën fillore “Vuk Karaxhiq” për banorët e Radevës, Lepinës, Skullanit, Suhadollit, Lagjes së Re dhe Hashanëve, si dhe për përfaqësuesit e Këshillave lokale të këtyre vendeve.
