Me ftesë të Shoqatës së Motrave Serbe “Bosiljka Bosa Pavlloviq”, dhjetë fëmijë nga Komuna e Graçanicës udhëtuan sot në mëngjes për në Pozharevc për të qenë pjesë e aktiviteteve të realizuara në kuadër të projektit “Kultura dhe identiteti i serbëve pa kufij – për fëmijët e Kosovës me dashuri” të cilin kjo organizatë e zbaton me mbështetjen e administratës së qytetit.
Përveç fëmijëve nga Graçanica, për në Pozharevc janë nisur edhe dhjetë fëmijë nga Komuna e Ranillugut, ndërsa transportin e ka siguruar Drejtoria e Arsimit dhe Kulturës në Komunën e Graçanicës.
Gjatë qëndrimit gjashtëditor, fëmijët do të jenë pjesë e punëtorive të shumta edukative si punëtoria e kaligrafisë, punëtoria e qëndisjes popullore dhe shumë të tjera. Do të organizohet edhe punëtoria artistike e organizuar nga Shoqata e Artistëve të Pozharevcit, e cila do t’i dedikohet Kosovës, njerëzimit, traditës dhe Shoqatës së motrave serbe.
Fëmijët nga Graçanica dhe Ranillugu do t’i vizitojnë gjithashtu objektet e shumta kulturore, fetare dhe historike si Katedralen, Oborrin ipeshkvnor, Manastirin e Tumanes, Kalanë e Ramit, galerinë e Millenës Pavlloviq Barilli, Muzeun Kombëtar dhe shumë vende të tjera.
Në kuadër të vizitës në Pozharevc, fëmijët do të priten nga kryetari i qytetit, ndërsa do të ketë edhe mysafirë të Shoqatës së Motrave Serbe në Smederevë gjatë kthimit në shtëpi.
Me këtë projekt, Shoqata e Motrave Serbe dëshiron ta bashkojë bamirësinë dhe edukimin e kulturës kombëtare.
