Pesë banorë të Shtëpisë rinore në Graçanicë, së bashku me fëmijët pjesëmarrës në punëtorinë “Duart punëtore”, kanë krijuar punime qeramike për dy muajt e fundit me mbikëqyrjen dhe ndihmën e mjeshtres artiste dhe skulptores, Jullija Dubovac, e cila sot hapi ekspozitën e tretë të veprave të rezultuara në Shtëpinë e kulturës në Graçanicë. Në hapje mori pjesë edhe kryetarja e Komunës së Graçanicës, prof. dr. Ljiljana Shubariq me bashkëpunëtorë.
Qëllimi i punëtorisë ishte t’i njihte ata me sekretet e qeramikës, të forconte aftësitë e tyre sociale dhe t’u jepte atyre mundësinë ta shfaqnin kreativitetin, imagjinatën dhe talentin e tyre.
Menaxherja e Shtëpisë rinore, Jellena Marinkoviq, në fjalimin e saj para të pranishmëve tha se veprat e ekspozuara nuk janë vetëm rezultat i talentit, por, siç tha ajo, i mundimit, i qëndresës dhe i dëshirës për t’u shprehur.
„Këto vepra flasin për vullnetin, rezistencën dhe dëshirën për të krijuar pavarësisht të gjitha sfidave me të cilat u përballën krijuesit. Në këtë ekspozitë kemi mundësinë të përjetojmë gjithçka përmes syve të personave me aftësi të kufizuara, ta rifreskojmë këndvështrimin tonë për artin dhe të frymëzohemi prej tij, përmes syve të bukurisë që ndoshta nuk e kemi vënë re më parë. Ato janë një tregues se asnjë pengesë nuk mund ta kufizojë krijimtarinë sepse me veprat e tyre jo vetëm që shpalosin forcën e tyre të brendshme, por edhe na kujtojnë se çdo person meriton mundësinë që të respektohet dhe të njihet në shoqëri për punën e tij”, tha Marinkoviq dhe i falënderoi të gjithë për kontributin e tyre në krijimtarinë që është rezultat i kësaj ekspozite.
Ekspozitën e hapi ligjëruesja në këtë punëtori mjeshtërja artiste – skulptore dhe asistente mësimore në kursin e metodave mësimore të edukimit artistik në Fakultetin e Arteve në Zveçan, Jullija Dubovac. Ajo tha se ekspozita shitëse, si rezultat i këtyre punëtorive, nuk shërben vetëm si një platformë dialogu në mes të pjesëmarrësve, por edhe si një hapësirë e gjerë për prezantimin e veprave artistike.
Në emër të banorëve, Sanella i përshëndeti të pranishmit dhe i falënderoi të gjithë për përpjekjet dhe ndihmën e tyre në përsosjen e talenteve dhe shfaqjen e tyre përmes krijimit të punimeve të qeramikës.
Ekspozitën e vizitoi kryetarja e Komunës së Graçanicës, prof. dr. Ljiljana Shubariq, së bashku me drejtoreshën e Drejtorisë Komunale të Shëndetësisë dhe Mirëqenies Sociale, Zorica Milliq, drejtoreshën e Drejtorisë Komunale të Arsimit, Brankica Niqiq dhe drejtorin e Drejtorisë Komunale të Administratës, Nikolla Marinkoviq.
Kryetarja Shubariq tha se Komuna e Graçanicës mbetet e përkushtuar që të kujdeset për të gjitha grupet e cenueshme sociale në territorin e Komunës së Graçanicës dhe se Shtëpia rinore është vetëm njëra prej tyre.
“Ne do të vazhdojmë të bëjmë gjithçka që mundemi për t’i bërë ata të ndihen të dobishëm, të rëndësishëm dhe anëtarë të barabartë të shoqërisë, sepse kjo u jep atyre vetëbesim dhe forcë shtesë. Ata sot e kaluan edhe një herë me nota të larta provimin jo vetëm të njerëzimit, por edhe të kulturës dhe krijimtarisë. Dëshiroj t’i përgëzoj të gjithë për krijimtarinë e tyre dhe t’i falënderoj të gjithë ata që ndihmuan në krijimin e këtyre punimeve të qeramikës”, tha Shubariq.
Ekspozita ka karakter humanitar. Paratë e mbledhura në ekspozitë do t’i paguhen institucionit social “Shtëpia rinore” nga Graçanica.
Organizatorët e ekspozitës ishin Shtëpia e kulturës e Graçanicës, Komuna e Graçanicës, Ministria e Kulturës dhe Informimit dhe Organi i përkohshëm i qytetit të Prishtinës. Pajisjet për punimin e objekteve janë siguruar nga Ndërmarrja sociale nga Graçanica, ndërsa zejtaria e pavarur “Amfora” nga Rahoveci i ka kryer përgatitjet përfundimtare të objekteve para ekspozitës.
