Çmimi “Trëndafili i triumfit” për gruan më të suksesshme në Komunën e Graçanicës këtë vit i takoi sipërmarrëses Zorica Andrejeviq nga Gushterica e Epërme. Aktiviteti u hap dhe çmimi u dorëzua nga kryetarja e komunës, prof. dr. Ljiljana Shubariq.
Me rastin e Ditës Ndërkombëtare të Gruas, sonte në Shtëpinë e kulturës në Graçanicë u mbajt manifestimi i tretë me rradhë me titull “Trëndafili i triumfit për gratë 2025”, i organizuar nga Organizata turistike e Graçanicës dhe me mbështetjen e Komunës së Graçanicës.
Ngjarjen e hapi kryetarja e Komunës së Graçanicës, prof.dr. Ljiljana Shubariq, e cila duke u uruar mirëseardhjen të gjithë të pranishmëve tha se ky manifestim u kushtohet të gjitha grave, e veçanërisht grave të cilat me punën, guximin dhe përkushtimin e tyre e bëjnë komunën tonë një vend më të mirë për të jetuar.
“Sonte i shënojmë dhe i festojmë sukseset e grave që kanë arritur rezultate të mëdha në fusha të ndryshme – ekonomi, art, arsim, kulturë, punë humanitare, e të ngjashme. Duam të tregojmë mirënjohje dhe respekt, sepse janë dëshmi se me vullnet dhe këmbëngulje mund të kapërcehen të gjitha vështirësitë dhe pengesat. Dhe kjo është arsyeja pse unë dua t’i inkurajoj gratë e të gjitha gjeneratave që të besojnë në vetvete dhe të luftojnë për qëllimet e tyre”, tha kryetarja Shubariq.
Kryetarja Shubariq theksoi edhe shfaqjen e shpeshtë të dhunës në familje dhe në mjedisin tonë, ku më së shumti viktima janë gratë. “Dhuna është e papranueshme dhe shkel të drejtat themelore të njeriut”. Mos heshni dhe duroni, sepse çdo grua ka të drejtën e respektit, sigurisë dhe dashurisë pa frikë”, tha Shubariq.
Çmimi “Trëndafili i triumfit” për gruan më të suksesshme iu dha Zoricës Andrejeviq, një sipërmarrëse nga Gushterica e Epërme. Juria në arsyetimin e saj theksoi se Zorica, me mbështetjen e familjes, i realizoi ëndrrat e saj duke filluar biznesin e saj – markën “Jagodica bobica”, që merret me kuzhinën tradicionale, nga llojet e ndryshme të verërave dimërore e deri te likeret e ndryshme frutash. Siç u përmend, ka edhe gra të përfshira në biznesin e saj, duke kontribuar kështu në jetesën e familjeve të tyre. Në këtë mënyrë, ajo ofron siguri për familjen e saj dhe mbështetje për gratë e tjera në komunitet. Theksohet se ajo është e martuar, nënë krenare e katër fëmijëve dhe gjyshe e shtatë nipërve.
Zorica i falënderoi të gjithë ata që e nominuan për çmimin e këtij viti, si dhe Komunën dhe Organizatën turistike që në këtë mënyrë theksuan rëndësinë e çdo gruaje në shoqëri. Gjashtë gra të tjera nga komuna jonë morën mirënjohje për punën dhe kontributin e tyre.
Në kuadër të këtij manifestimi, të pranishmit kishin mundësi ta shijojnë performancën muzikore “Koncert për shpirtin” të solistit të RTS-së, Millosh Radoviq, të shoqëruar nga pianisti Alleksandar Radoviq.
