Nëntë pjestarë të komuniteteve pakicë nga territori i Komunës së Graçanicës nënshkruan sot kontrata për marrjen e granteve bujqësore në bazë të marrëveshjes ndërmjet Komunës së Graçanicës dhe organizatës “Iniciativa për zhvillimin bujqësor të Kosovës”.
Ky bashkëpunim është pjesë e projektit “Fuqizimi i komuniteteve rurale përmes zhvillimit të bujqësisë”, financuar nga Agjencia Suedeze për Bashkëpunim Ndërkombëtar për Zhvillim (SIDA) dhe përfaqësuar nga Ambasada Suedeze në Kosovë. Fondet e projektit menaxhohen nga Këshilli Danez për Refugjatët, ndërsa zbatimi i tij kryhet nga Iniciativa për Zhvillimin e Bujqësisë së Kosovës (IADK).
Përfituesit e granteve u mirëpritën nga kryetarja e Komunës së Graçanicës, prof.dr. Ljiljana Shubariq.
“Ju dëshiroj shumë suksese në punën e ardhshme. Komuna e Graçanicës është komunë multikulturore dhe multietnike dhe si qeverisje lokale i përkrah të gjitha komunitetet në mënyrë të barabartë, siç e dëshmojmë me këtë projekt. Fokusi i punës sonë mbetet fuqizimi i bujqësisë, pasi një pjesë e madhe e popullsisë sonë është e angazhuar në një lloj aktiviteti bujqësor”, tha Shubariq.
Drejtori ekzekutiv i Iniciativës për zhvillimin e bujqësisë së Kosovës, Zenel Bunjaku, e ka falënderuar Komunën e Graçanicës dhe kryetaren Ljiljana Shubariq për bashkëpunimin e deritanishëm.
“Jam i kënaqur që po e realizojmë me sukses memorandumin e nënshkruar me Komunën e Graçanicës, i cili është pjesë e këtij projekti. Në Komunën e Graçanicës kemi mbështetur nëntë përfitues dhe jemi të gatshëm të vazhdojmë bashkëpunimin me Komunën e Graçanicës në mënyrë që të ndihmojmë një numër më të madh të komuniteteve pakicë”, tha Bunjaku.
Në bazë të kontratave të nënshkruara, dorëzimi i mjeteve bujqësore dhe mekanizimit do të kryhet në ditët në vijim. Përveç ndihmës në fushën e bujqësisë, në përputhje me projektin, për përfituesit e granteve do të sigurohen këshillat profesionale nga ekspertët për përmirësimin e prodhimit bujqësor.
Projekti është duke u zbatuar edhe në disa komuna tjera të Kosovës.
