Gjenerali brigade dhe zëvendës komandanti i KFOR-it në Kosovë, Cahit Irican, vizitoi sot Komunën e Graçanicës me një delegacion të KFOR-it, ku u takua me kryetaren e Komunës së Graçanicës, prof. dr. Ljiljana Shubariq dhe këshilltarin e saj, Sasha Daniq.
Kryetarja e Komunës së Graçanicës, prof. dr. Ljiljana Shubariq, e njoftoi mysafirin se popullsia e Komunës së Graçanicës ndihet e pasigurt dhe është në frikë të vazhdueshme nga presionet institucionale dhe administrative nga nivelet qendrore të qeverisjes.
Ajo deklaroi se në këtë kuptim, Komuna e Graçanicës është e margjinalizuar institucionalisht sepse në shumë raste as nuk konsultohet kur bëhet fjalë për marrjen e vendimeve të rëndësishme në territorin e saj.
Si shembull, ajo e përmendi vendimin e Qeverisë së Kosovës për fillimin e ndërtimit të “Qendrës rezidenciale për autizëm, sindromë daun dhe aftësi të kufizuar për fëmijë, persona të rritur dhe të moshës së shtyrë” në pronën e saj në Graçanicë, pa pëlqimin e komunës, si dhe se komuna duhej të ndërmerrte veprime ligjore për ta ndaluar dhe rregulluar ligjërisht këtë proces.
Ajo i kërkoi KFOR-it angazhim më të madh në terren si një nivel më i lartë mbrojtjeje të popullsisë sepse, siç tha ajo, popullsia nuk ka besim të mjaftueshëm në Policinë e Kosovës.
Kryetarja theksoi se Komuna e Graçanicës është një komunë multietnike, se të gjitha komunitetet trajtohen në mënyrë të barabartë dhe se komuna përpiqet të bëjë investime të barabarta në të gjitha mjediset, gjë që, siç theksoi ajo, tregon vullnet të mirë në ndërtimin e vlerave demokratike.
Zëvendëskomandanti i KFOR-it, Cahit Irican, tha se KFOR-i mbetet i përkushtuar ndaj misionit të tij për krijimin e një mjedisi të sigurt dhe paqësor për të gjithë qytetarët, duke deklaruar se “gjeografia është fati i njerëzve” dhe se nuk ka vend në botë ku jeton vetëm një komb, prandaj, sipas tij, respekti dhe mirëkuptimi janë çelësi i paqes dhe progresit.
Zëvendëskomandanti i KFOR-it, Cahit Irican, vizitoi Komunën e Graçanicës në kuadër të vizitave të tij zyrtare në komunat e Kosovës, me qëllim që të informohej rreth situatës aktuale të sigurisë në përgjithësi, në një bisedë me udhëheqjen.
