Me qëllim të përmirësimit të shërbimeve shëndetësore, Komuna e Graçanicës dhuroi një automjet sanitar të pajisur plotësisht Shtëpisë së shëndetit në Gushtericën e Poshtme.
Automjeti është siguruar përmes Drejtorisë së Shëndetësisë dhe Mirëqenies Sociale, ndërsa çelësat e automjetit të ri zyrtarisht janë dorëzuar drejtorit të Shtëpisë së shëndeit, dr. Sasha Mlladenoviq, nga kryetarja e Komunës së Graçanicës, prof.dr. Ljiljana Shubariq. Në dorëzim mori pjesë edhe drejtoresha e Shëndetësisë, Zorica Milliq.
Me këtë rast, kryetarja Shubariq theksoi se Komuna e Graçanicës po e përmirëson vazhdimisht sistemin shëndetësor dhe se blerja e automjetit sanitar ka përmbushur një premtim tjetër.
“Komuna e Graçanicës, në përputhje me mundësitë e saj, e ndihmon shëndetësinë me qëllim të përmirësimit të kushteve të punës së punëtorëve shëndetësorë dhe kujdesin shëndetësor të qytetarëve tanë. Duke blerë automjet sanitar, ne e kemi përmbushur premtimin tonë dhe qeverisja lokale do të vazhdojë me mbështetjen edhe në të ardhmen, tha kryetarja Shubariq.
Ajo shtoi se donacioni është realizuar në prag të festës së mjekëve të Shën Kozmait dhe Damianit, gjë që i jep këtij akti një simbolikë dhe mbështetje të veçantë për punonjësit shëndetësorë dhe kërkesës së tyre.
Drejtori i Shtëpisë së shëndetit, dr. Sasha Mlladenoviq, është pajtuar se donacioni është veçanërisht i rëndësishëm sepse erdhi gjatë një feste që festohet si Dita e mjekëve në të gjitha institucionet shëndetësore. Ne emër të institucionit shëndetësor, ai shprehu falënderim për donacionin e vlefshëm, duke theksuar se do ta lehtësonte shumë punën e përditshme dhe transportin e pacientëve.
“Kishim nevojë urgjente për një automjet sanitar, sepse çdo ditë transportojmë pacientë në qendra më të mëdha klinike në Serbinë qendrore. Parku ynë i automjeteve është vjetëruar dhe konsumuar, kështu që ky automjet do të kontribuojë ndjeshëm në një punë më cilësore dhe më të sigurt”, tha Mlladenoviq.
Drejtoresha e Drejtorisë së Shëndetësisë, Zorica Milliq, theksoi edhe një herë se Komuna e ka ndihmuar më parë Shtëpinë e shëndetit përmes blerjes së pajisjeve të ndryshme mjekësore dhe materialeve të nevojshme.
“Duke blerë një automjet sanitar, ne po vazhdojmë të investojmë në institucionet shëndetësore, gjë që konfirmon angazhimin tonë për përmirësimin e shërbimeve shëndetësore dhe kushteve të punës së këtyre institucioneve”, tha Milliq.
