Kryetarja e Komunës së Graçanicës, prof. dr. Ljiljana Shubariq, kryesoi mbledhjen e dytë të rregullt të Këshillit Komunal për Siguri në Bashkësi, ku tema kryesore ishte situata aktuale e sigurisë në komunë.
Shubariq tha se situata e sigurisë “nuk është më e mira, por aktualisht është e qëndrueshme”, duke vënë në dukje se mund të ndryshojë në çdo kohë dhe se duhet të jemi vigjilentë. Ajo shtoi se procesi zgjedhor u zhvillua në mënyrë paqësore dhe pa incidente dhe se kohët e fundit nuk ka pasur probleme të mëdha sigurie.
Zëvendëskomandanti i Stacionit të Policisë së Graçanicës, Sulejman Sulejmani, gjithashtu foli, duke thënë se sipas raporteve ditore të policisë, situata aktuale është e qetë dhe e qëndrueshme. Sipas tij, në tetor u regjistruan 60 raste, duke përfshirë 17 aksidente trafiku, 10 vjedhje (7 prej të cilave ishin të rënda) dhe tre raste të dhunës në familje.
Anëtarja e Këshillit, Snezhana Jovanoviq, vuri në dukje rritjen e disponueshmërisë së alkoolit dhe substancave psikoaktive për të rinjtë, duke theksuar nevojën për masa shtesë parandaluese. U diskutua edhe çështja e dhunës në familje, me përfundimin se është i nevojshëm një angazhim më i madh i të gjitha institucioneve përkatëse.
Zëvendëskomandanti tha se janë regjistruar tre raste që lidhen me substanca psikoaktive dhe në njërën prej tyre janë gjetur 22 kilogramë substancë, pa thënë se për çfarë saktësisht bëhet fjalë.
Jovanoviq e njoftoi gjithashtu këshillin për projektin me OSBE-në, përmes të cilit janë blerë katër pajisje për zbulimin e shpejtësisë së automjeteve. Pajisjet shfaqin shpejtësinë në monitor, së bashku me mesazhe paralajmëruese për shoferët që tejkalojnë limitin. Ato do të instalohen pasi të përcaktohen vendet e sakta, por sipas saj, dy do të instalohen në Gushtericë, ndërsa nga një në Kishnicë dhe Sushicë, pranë shkollës.
Në fund të mbledhjes, kryetarja Shubarqi i falënderoi anëtarët e Këshillit për bashkëpunimin e tyre, duke thënë se mandati i saj po mbaron. Ajo theksoi veçanërisht se tensionet në Kishnicë janë qetësuar në periudhën e kaluar, falë punës së përbashkët dhe reagimit në kohë.
“Këshilli i Sigurisë ka pasur një rol të rëndësishëm dhe jo të lehtë. Jemi përballur me sfida, por kemi vepruar me përgjegjësi dhe gjithmonë jemi përpjekur të gjejmë zgjidhjen më të mirë përmes dialogut. Jam krenare për gjithçka që kemi bërë, përgjigjet urgjente dhe bashkëpunimin me institucione dhe organizata të tjera”, përfundoi Shubariq.
