Në objektin e Komunës së Graçanicës është mbajtur mbledhja e dytë e jashtëzakonshme e Kuvendit të Komunës së Graçanicës, në të cilën është formuar Komiteti për Politikë dhe Financa dhe Komiteti për Komunitete, si dhe është emëruar nënkryetari i komunës për komunitete dhe zëvendëskryesuesi i Kuvendit të komunës.
Mbledhja filloi me dhënien e deklaratës solemne të asamblistëve të sapoemëruar të Kuvendit të komunës. Në vend të kryetarit të Komunës së Graçanicës, Novak Zhiviq, mandatin e asamblistit nga “Lista Serbe” e mori Dijana Zhiviq, ndërsa në vend të Igor Rashiqit nga partia “Për Liri, Drejtësi dhe Mbijetesë”, mandatin e mori Nikolla Rashiq.
Asamblistët më pas miratuan procesverbalin e mbledhjes konstituive të Kuvendit të komunës, të mbajtur në fillim të dhjetorit të këtij viti.
Në mbledhje u emërua nënkryetari i Komunës së Graçanicës për komunitete. Kryesuesi i Kuvendit të komunës, Millan Dimitrijeviq, theksoi se, në përputhje me Ligjin për vetëqeverisjen lokale, kjo pozitë i përket komunitetit më të madh minoritar, prandaj në këtë pozitë u zgjodh Leutrim Ajeti nga “Aleanca Shqiptare”.
Me propozim të kryesuesit, Millan Dimitrijeviq, u zgjodh edhe zëvendëskryesuesi i Kuvendit të Komunës së Graçanicës. Ligji për vetëqeverisjen lokale kërkon që kjo pozitë të zgjidhet nga radhët e partisë më të madhe minoritare, kështu që Bekim Gashi u zgjodh në këtë pozitë, gjithashtu nga “Aleanca Shqiptare”.
Mbledhja vazhdoi me formimin e komiteteve të Kuvendit të komunës. Komiteti për Politikë dhe Financa ka pesë anëtarë – tre nga “Lista Serbe” dhe nga një përfaqësues nga partia “Për Liri, Drejtësi dhe Mbijetesë” dhe “Aleanca Shqiptare”. Komiteti për Komunitete ka nëntë anëtarë dhe përbëhet nga përfaqësues të të gjitha komuniteteve në territorin e Komunës së Graçanicës.
Në mbledhje u diskutua dhe u miratua Propozim-vendimi për miratimin e listës së pronave të paluajtshme të komunës të destinuara për shfrytëzim në vitin 2026.
