Në Zyrën e Zhvillimit Ekonomik në Graçanicë u mbajt ceremonia e shënimit të përfundimit të trajnimit në kuadër të projektit “Shfrytëzimi i fondeve të Bashkimit Evropian”, i cili zbatohet nga Ministria e Mbrojtjes e Republikës së Sllovenisë – Drejtoria për Çështjet e Mbrojtjes.
Në trajnim morën pjesë pjesëmarrësit nga komunat e Graçanicës dhe Leposaviqit, të cilët fituan njohuri dhe aftësi praktike në fushën e përgatitjes dhe zhvillimit të propozimeve të projekteve përmes dy moduleve. Me këtë rast, pjesëmarrësve iu ndanë certifikatat për trajnimin e përfunduar me sukses.
Në emër të Komunës së Graçanicës, të pranishmit i përshëndeti drejtori i Drejtorisë së Administratës, Vlladica Trajkoviq, i cili i falënderoi përfaqësuesit e Republikës së Sllovenisë dhe kontingjentit slloven të KFOR-it për bashkëpunimin dhe mbështetjen e tyre deri më tani.
Trajkoviq theksoi veçanërisht rëndësinë e projekteve të shumta të zbatuara me mbështetjen e kontingjentit slloven të KFOR-it, duke veçuar trajnimin e zjarrfikësve, si dhe ndihmën dhe mbështetjen në sektorin e shëndetësisë.
Në emër të Ministrisë së Mbrojtjes së Republikës së Sllovenisë, foli drejtuesja e Sektorit të Mbrojtjes Civile në Drejtorinë për Çështjet e Mbrojtjes, Alleksandra Petroviq. Ajo i përgëzoi pjesëmarrësit për përpjekjet e tyre dhe përfundimin me sukses të trajnimit, duke theksuar se njohuritë e fituara gjatë trajnimit mund të jenë baza për zbatimin e projekteve të ardhshme.
Ajo i falënderoi komunat e Graçanicës dhe Leposaviqit për bashkëpunimin e tyre të mirë, si dhe kontingjentin slloven të KFOR-it për koordinimin dhe zbatimin e projektit.
Në ceremoni morën pjesë ambasadori i Republikës së Sllovenisë në Prishtinë, Borut Bllaj, komandanti i kontingjentit slloven të KFOR-it, nënkoloneli Danillo Kllinar, përfaqësuesit e Ministrisë së Mbrojtjes të Republikës së Sllovenisë – Drejtoria për Çështjet e Mbrojtjes, përfaqësuesit e komunave të Graçanicës dhe Leposaviqit, si dhe kontraktorët ekspertë të projekteve.
