Përkundër shiut dhe erës, një numër i madh i fëmijëve u mblodhën sot përpara Komunës së Graçanicës, të shoqëruar nga prindërit e tyre, për të qenë pjesë e ngjarjes që tashmë është bërë tradicionale në Graçanicë – Thyerja e Bukës së Krishtlindjeve. Më me fat tërhoqën tre monedha ari, ndërsa fëmijëve të pranishëm iu dhanë dhuratat e Krishtlindjeve të ofruara nga Organizata turistike e Graçanicës.
Falë bashkëpunimit të Komunës së Graçanicës dhe Organizatës turistike të Graçanicës, thyerja e bukës së Krishtlindjeve, e cila përmbante tre monedha ari, u organizua përpara ndërtesës komunale edhe këtë vit.
Buka (çesnica), e punuar nga kryetarja e shoqatës joformale “Tradita nëpër shekuj”, Danijella Simonoviq nga Batusha, u thye në prani të shumë fëmijëve, organizatorit dhe kryetarit të Komunës së Graçanicës, Novak Zhiviq.
Këtë vit, çesnica peshonte 10 kilogramë dhe fituesit e monedhave të arta ishin Illija Shubariq nga Graçanica, Alleksa Stoiljkoviq nga Sushica, ndërsa fituesi i tretë ende nuk është lajmëruar.
Me përshëndetjen tradicionale të krishterë “Paqja e Zotit – Krishti lindi”, fëmijët e mbledhur dhe të gjithë të pranishmit u përshëndetën nga kryetari i Komunës së Graçanicës, Novak Zhiviq.
“Ne e vazhdojmë traditën tonë, e ruajmë besimin tonë, e respektojmë zakonin tonë të bukur. I përgëzoj fëmijët që gjetën dhe fituan monedhat e arta. Lumturia dhe shëndeti i shërblefshin. Ne do të jemi gjithmonë aty për ta sepse ata janë e ardhmja dhe thesari ynë. Uroj që të gjithë serbët ta mbrojnë shtëpitë e tyre, familjet e tyre dhe kjo ditë të na japë forcë, harmoni dhe të mbijetojmë në gëzim, por edhe të ndërtojmë paqe dhe respekt të ndërsjellë me fqinjët tanë”, tha kryetari Zhiviq.
Drejtoresha e Organizatës turistike të Graçanicës, Sandra Gjokiq, tha se është e kënaqur që ky aktivitet vizitohet gjithnjë e më shumë vit pas viti.
“Në frymën e unitetit, katër vjet më parë filluam të organizojmë thyerjen e bukës së Krishtlindjeve dhe shohim se çdo vit gjithnjë e më shumë, veçanërisht qytetarët tanë më të vegjël, janë këtu me ne për Krishtlindje. Ajo që është shumë e rëndësishme është ta kujtojmë traditën e mëparshme, kishim dëshirë ta ringjallnim atë dhe ajo që tashmë mund të shohim sot është se thyerja e bukës së Krishtlindjeve po organizohet në shumë vende të tjera”.
Pas thyerjes së bukës së Krishtlindjeve, frutat u shpërndanë për të gjithë fëmijët e pranishëm.
Në mesnatë, u shërbye liturgjia. Midis njerëzve në Manastirin e Graçanicës edhe kryetari Novak Zhiviq.
Me rastin e festës më të gëzueshme krishtere të Krishtlindjeve, peshkopi i Rashkës dhe i Prizrenit, Teodosije, me klerikët e Dioqezës së Rashkës dhe Prizrenit, shërbeu Liturgjinë e shenjtë festive sonte në praninë e një numri të madh të besimtarëve. Në Liturgjinë e shenjtë mori pjesë edhe kryetari i Komunës së Graçanicës, Novak Zhiviq.
Para njerëzve që mbushën kishën u lexua Epistola e Krishtlindjeve e patriarkut serb Porfirija, me mesazhe paqeje, dashurie dhe shprese.
Pas liturgjisë, më të vegjëlve iu shpërndanë dhuratat e Krishtlindjeve, dhuratat nga Komiteti për Ndihmë për Serbët në Kosovë dhe Metohi nga Republika Srpska.
