Në objektin e Komunës së Graçanicës, me rastin e Ditës Ndërkombëtare të Romëve, të organizuar nga OSBE-ja dhe Komuna e Graçanicës, u mbajt takimi me gratë rome nga Graçanica dhe Obiliqi, në të cilin u diskutuan përpjekjet e pushtetit lokal për përmirësimin e pozitës së komunitetit rom, si dhe problemet me të cilat ballafaqohet ky komunitet.
Të pranishmit në sallën e Kuvendit të Komunës së Graçanicës i përshëndeti kryetarja e Komunës, prof.dr. Ljiljana Shubariq, e cila e uroi komunitetin rom për Ditën e Romëve. Më pas, Shubariq foli për mbështetjen që pushteti lokal i jep komunitetit rom në komunë, që nga arsimi dhe kultura e deri te projektet specifike që synojnë fuqizimin e tyre.
“Siç e dini, në komunën tonë ekzistojnë tre qendra edukative, të cilat falë pajisjeve të modernizuara po tërheqin një numër në rritje të fëmijëve dhe të rinjve romë. Komuna e Graçanicës është e vetmja që ka një bibliotekë në gjuhën rome. Ne mbështetëm transmetimin radiofonik në gjuhën rome. Falë kësaj, sot kemi një numër më të madh të fëmijëve romë në shkolla dhe për këtë arsye ata do të kenë mundësi më të mëdhaja në të ardhmen për vende më të mira të punës”, tha Shubariq.
Sipas saj, Komuna në bashkëpunim me shumë partnerë – OSBE-në, KFOR-in, UNHCR-in, Këshillin e Evropës, Këshillin Danez për Refugjatë, Romakted e të tjerë, vazhdon ta mbështesë komunitetin rom përmes programeve dhe donacioneve të ndryshme sociale dhe infrastrukturore.
“Kishte shumë projekte të mira që synonin fuqizimin ekonomik, veçanërisht për gratë përmes kurseve të qepjes dhe makinerive me materiale, donacioneve të motokulturatorëve me pajisje përcjellëse për grumbulluesit informalë të mbeturinave, drurit për ngrohje, pakove ushqimore dhe higjienike. Familjet rome përfituan banesa në Suhadoll, si dhe banesa të ndërtuara nga komuna”, tha Shubariq dhe shtoi se do të vazhdohet, në bashkëpunim me partnerët ndërkombëtarë, në përmirësimin e jetës të të gjithë qytetarët, duke e përfshirë edhe komunitetin rom.
Të pranishmit u mirëpritën dhe u përshëndetën për Ditën Ndërkombëtare të Romëve nga zyrtarja e lartë e komunitetit në Qendrën Rajonale të OSBE-së në Prishtinë, Giulia Datovo, si dhe koordinatoret e Rrjetit të Grave për Siguri, Millica Kostiq dhe Suzana Hashani. I pranishëm ishte edhe këshilltari Sasha Daniq.
Pastaj vijoi diskutimi, gratë nga komuniteti rom patën mundësinë t’i tregojnë problemet me të cilat përballen në jetën e tyre të përditshme.
