Që opinioni të mos privohet nga informacioni për aktivitetet e kryetares së Komunës së Graçanicës, prof. dr. Ljiljane Shubariq dhe ekipi juridik i Komunës së Graçanicës lidhur me vendimin e Qeverisë së Kosovës nr.05/218 për ndërtimin e “Qendrës rezidenciale të Kosovës për autizëm, sindromë daun dhe aftësi të kufizuar për fëmijë, persona të rritur dhe të moshës së shtyrë” në tokë që është kryesisht në pronësi të Komunës së Graçanicës dhe të cilën Qeveria e Kosovës me vendim e shpalli me interes publik dhe ia dha për 99 vjet Shoqatës bamirëse “Jetimat e Ballkanit”, Komuna e Graçanicës lëshon NJOFTIM PUBLIK si në vijim.
Më datën 24.10.2024, në Gjykatën Themelore në Prishtinë, si instancë e shkallës së parë, Komuna e Graçanicës ka paraqitur padi kundër Qeverisë së Kosovës për anulimin e aktit administrativ me propozim për pezullimin e ekzekutimit të vendimit të Qeverisë së Kosovës nr.05/218 të datës 28.08.2024. Së bashku me provat e bashkangjitura, ekipi juridik i Komunës së Graçanicës në padi theksoi se Vendimi i Qeverisë së Kosovës është i kundërligjshëm, në kundërshtim me parimet e demokracisë dhe se cenon interesin e Komunës së Graçanicës dhe në një shkallë më të gjerë, dëmton zhvillimin e mëtejshëm.
Një ditë më vonë, më datën 25.10.2024, u mbajt mbledhja e jashtëzakonshme e Kuvendit të Komunës së Graçanicës, ku asamblistët miratuan Konkluzionet që përcaktojnë qartë qëndrimin e Kuvendit lidhur me këtë çështje, përkatësisht se Kuvendi qartazi e kundërshton miratimin e njëanshëm të këtij vendimi në pjesën që i referohet konfiskimit të pronësisë së parcelave. Qëndrimi i Komunës së Graçanicës është shprehur qartë edhe në kundërshtimin e dërguar Qeverisë së Kosovës me dokumentacionin përcjellës nga Kabineti i kryetares së Komunës së Graçanicës më datën 28.10.2024.
E përsërisim se Qeveria e Kosovës vendimin e ka marrë me vetëiniciativë të sajën, pa konsultim dhe miratim të Komunës së Graçanicës dhe nuk kemi marrë asnjë përgjigje për veprimet ligjore që i kemi iniciuar deri më tani.
Kryetarja e Komunës së Graçanicës, prof.dr. Ljiljana Shubariq, si dhe e gjithë udhëheqja komunale, do të vazhdojnë t’i shfrytëzojë të gjitha mjetet ligjore dhe demokratike dhe në diskutime me zyrtarët ndërkombëtarë do të bëjnë gjithçka për ta ndalur këtë synim të Qeverisë së Kosovës, dhe bashkëqytetarët tanë nuk duhet të kenë asnjë dyshim lidhur me këtë.
Sfidat dhe presionet e shumta administrative me të cilat përballemi si qeverisje lokale janë bërë të përditshme dhe zgjidhja e tyre për të mirën e të gjithë qytetarëve tanë ndërlikohet edhe më tej nga qasjet e dobëta analitike dhe fushatat politike të individëve dhe organizatave në të cilat paraqiten interpretimet dhe spekulimet paushall për rolin e Komunës së Graçanicës në marrjen e këtij vendimi nga Qeveria e Kosovës.
Komuna e Graçanicës beson se padia do të shqyrtohet seriozisht dhe do të zgjidhet në favor të qeverisjes lokale, e cila, e përsërisim, kundërshton konfiskimin e pronës së paluajtshme komunale të qytetarëve të saj.
Komuna e Graçanicës, si edhe më parë, mbetet e përkushtuar për secilin qytetar të saj, duke bërë gjithçka për të investuar, ndërtuar, ndihmuar dhe krijuar për çdo individ dhe çdo familje.
Si gjithmonë deri më tani, në mënyrë transparente, padykuptime dhe të arsyetuar do ta njoftojmë opinionin për të gjitha detajet lidhur me këtë rast, të cilin Komuna e Graçanicës e konsideron shumë serioz dhe thelbësor, i cili do të zgjidhet me mjete institucionale, ligjore dhe demokratike.
