Kryetari i Komunës së Graçanicës, Novak Zhiviq, u takua me përfaqësuesit e organizatës gjermane ASB, me të cilët bisedoi për vazhdimin e bashkëpunimit të suksesshëm dhe realizimin e projektit të fundit lidhur me donacionin e dronit për monitorimin vizual të terrenit Stacionin e Zjarrfikësve në Llapllasellë.
Ky është takimi i parë i kryetarit Zhiviq me përfaqësuesit e organizatës ASB (Arbeiter-Samariter-Bund Deutschland e. V.) që nga marrja e detyrës. Gjatë takimit është theksuar se ASB ka arritur një bashkëpunim të mirë me qeverisjen lokale për vite me radhë, përmes realizimit të projekteve të shumta që synojnë përmirësimin e kushteve të jetesës së qytetarëve.
Falë këtij bashkëpunimi, organizata ASB dhuroi një dron për monitorimin vizual të terrenit për Stacionin e Zjarrfikësve në Llapllasellë, i cili do të përdoret kryesisht në situata emergjente. Donacioni synon përmirësimin e kapaciteteve operacionale të Shërbimit të zjarrfikësve dhe shpëtimit, duke mundësuar reagim më të shpejtë dhe më efikas në rastet e zjarreve, përmbytjeve dhe emergjencave të tjera, por edhe monitorim më të lehtë të terrenit të vështirë për t’u aksesuar.
Kryetari i Komunës së Graçanicës, Novak Zhiviq, i falënderoi përfaqësuesit e ASB për mbështetjen e tyre të gjatë dhe theksoi rëndësinë e donacionit të fundit.
“Ky donacion është me rëndësi të jashtëzakonshme për komunën tonë, sepse çdo mbështetje për Shërbimin e zjarrfikësve kontribuon në sigurinë e të gjithë qytetarëve. Komuna mbetet e përkushtuar për bashkëpunim me organizata të tilla si ASB”, tha Zhiviq.
Përfaqësuesja e organizatës, Dafina Hoxha, theksoi se është e lumtur që bashkëpunimi me udhëheqjen e re të Komunës së Graçanicës po vazhdon dhe se përmes këtij projekti ata mund të kontribuojnë në përmirësimin e kushteve të punës së departamentit të zjarrfikësve në Llapllasellë.
Në takim u diskutua gjithashtu për iniciativat e përbashkëta të ardhshme, kryesisht në fushën e fuqizimit të grave.
Në takim morën pjesë edhe koordinatorja e Qendrës për Angazhim Komunitar, Sandra Gjekiq, si dhe drejtori i Zhvillimit Ekonomik, Nebojsha Millovanoviq. Së bashku me përfaqësuesit e organizatës ASB, ata vizituan zjarrfikësit dhe ua dorëzuan dronin për përdorim.
