Nëntë pjesëtarë të komuniteteve pakicë nga territori i Komunës së Graçanicës morën sot makina bujqësore dhe mekanizim, duke u bazuar në marrëveshjen ndërmjet Komunës së Graçanicës dhe Organizatës “Iniciativa e Zhvillimit të Bujqësisë së Kosovës”.
Bëhet fjalë për projektin “Fuqizimi i komuniteteve rurale përmes zhvillimit të bujqësisë”, i financuar nga Agjencia Suedeze për Bashkëpunim Ndërkombëtar për Zhvillim (SIDA), e përfaqësuar nga Ambasada Suedeze në Kosovë, me bashkëfinancim nga Komuna e Graçanicës. Mjetet e projektit menaxhohen nga Këshilli Danez për Refugjatët, ndërsa zbatimi i tij kryhet nga Iniciativa për Zhvillimin e Bujqësisë së Kosovës (IADK).
Përfituesve iu ndanë motokultivatorë me rimorkio dhe pajisje përcjellëse, ciklonet për plehrat minerale, spërkatës dhe freza, të gjitha me synim të nxitjes së aktivitetit bujqësor.
Në emër të Komunës, në shpërndarjen morën pjesë nënkryetari i Komunës për komunitete Leutrim Ajeti, këshilltari për komunitete, Gazmen Sallijeviq dhe drejtori i Drejtorisë së Bujqësisë, Bogiq Gjuroviq.
“Drejtoria e Bujqësisë e ka dhënë kontributin e saj në këtë projekt, i cili është i dedikuar për komunitetin pakicë. Ne si komunë kemi marrë pjesë dhe shpresoj se do të vazhdojmë të kemi një bashkëpunim kaq të mirë edhe në të ardhmen, si me këtë ashtu edhe me organizata të tjera që synojnë përmirësimin e prodhimit bujqësor, sepse Komuna e Graçanicës është lider në atë sektor. Shpresoj që përfituesit t´i përdorin makinat dhe mekanizimin në mënyrë të duhur dhe se kjo do t’ua lehtësojë punën”, tha Gjuroviq.
“Në përgjithësi, ky është një hap pozitiv që do të thotë shumë për familjet që jetojnë nga puna e tyre. Përveç makinerive, ata do të marrin ndihmë edhe nga ekspertët për përmirësimin e prodhimit bujqësor. Komuna sigurisht që është e gatshme të vazhdojë me projekte të tilla”, tha Sallijeviq.
Drejtori ekzekutiv i Iniciativës për Zhvillimin e Bujqësisë së Kosovës, Zenel Bunjaku, tha se ky projekt është dedikuar kryesisht për komunitetin rom, eshkali dhe egjiptian, të cilët për shkak të gjendjes së tyre të vështirë sociale kanë nevojë për këtë lloj të mbështetjes.
Njëri nga përfituesit, Ismail Bytyqi nga Livagja, tha se me ndihmën e një motokultivuesi dhe pajisjeve përkatëse do të përmirësohet puna e tij.
“Kam rreth njëzet vjet që merrem me bujqësi, e kam tokën time dhe një pjesë me qira. Falë pajisjeve do ta përmirësoj punën time, do të jetë më e lehtë. Kryesisht prodhoj perime, jam vazhdimisht në tregun e Graçanicës. Kur malli është i mirë dhe cilësor, ai shitet shpejt”, tha Bytyqi.
Projekti është duke u zbatuar edhe në disa komuna tjera të Kosovës.
