Në kuadër të programit “Ditët e Graçanicës 2024-Vera argëtuese dhe kulturore”, për të dytin vit radhazi u mbajt në Graçanicë krosi “Nuk është bujë, është garë”, me qëllim të zhvillimit të aftësive sportive dhe mbështetje reciproke.
Krosi mblodhi rreth njëqind vrapues në dy kategori – deri në 14 vjeç, për të cilët starti ishte para Shtëpisë së kulturës “Graçanica” dhe mbi 14 vjeç, për të cilët starti ishte në pllaton afër “Voçarit”. Ata vrapuan përgjatë rrugës “Car Llazar” deri te ndërtesa e Komunës së Graçanicës. Në fillim të garës, pjesëmarrësit të shoqëruar nga bashkëpunëtorë, i përshëndeti kryetarja e Komunës së Graçanicës, prof. dr. Ljiljana Shubariq, e cila më pas i takoi në vijën e finishit, ku ndau çmime modeste për më të mirët.
Në kategorinë e parë, të më të rinjve, më të mirët ishin garuesit nga Graçanica. Fitoi Lluka Gjekiq, vendin e dytë e fitoi Jusuf Sallijeviq dhe i treti ishte Branisllav Gjekiq. Në kategorinë e dytë, të më të vjetër, më i miri ishte Sava Gjekiq nga Llapllasella, vendin e dytë e fitoi Damjan Josifoviq nga Graçanica dhe i treti Strahinja Dimiq nga Llapllasella.
Ata morën çmime në formë të kupave dhe medaljeve, si dhe çmime të vogla monetare, të cilat ua dhuroi kryetarja Ljiljana Shubariq, e cila theksoi se gara është organizuar para festës së Zojës së Vogël, e cila festohet si Dita e Komunës së Graçanicës.
“Jam e lumtur që morën pjesë një numër i madh garuesish, gjë që tregon se bashkëqytetarët tanë e njohën rëndësinë e mbajtjes së aktiviteteve sportive, kulturore dhe rekreative që e nxisin moralin sportiv, shëndetin, miqësinë, shoqërimin dhe bashkimin, gjithçka që na nevojitet në këtë moment. Konkurrentët më të mirë u shpërblyen në mënyrë modeste, por mendoj se të gjithë ne që ishim pjesëmarrës dhe pjesë e krosit sot jemi fitues, sepse dërguam një foto të bukur nga Graçanica jonë, një foto e bashkimit, harmonisë dhe unitetit”, tha kryetarja Shubariq.
Ajo rikujtoi edhe një herë se nesër Komuna feston ditën e saj dhe i ftoi të gjithë të pranishmit dhe të gjithë qytetarët që të marrin pjesë në Liturgjinë e shenjtë dhe meshën që do të organizohet me rastin e festës së Zojës së Vogël dhe Ditës së Komunës së Graçanicës.
Fituesi i krosit në kategorinë më të vjetër, Sava Gjekiq, vendosi t’i dhurojë paratë e tij të çmimit për qëllime humanitare.
“Nuk u përgatita shumë, sepse jam stërvitur gjatë gjithë jetës, ndaj nuk e kam pasur të vështirë. Shpërblimin tim do ta përcjell për qëllime humanitare për trajtimin e vogëlushit Tadija Velliq nga Graçanica”, tha Gjekiq.
Këtë gjest human e ka mirëpritur drejtori i Drejtorisë për Rini dhe Sport, Dushan Cvejiq.
“Ky kros, ndër të tjera, duhet ta tregojë unitetin, miqësinë dhe humanizmin tonë për të treguar se jemi para së gjithash njerëz punëtorë dhe të mirë, e më pas konkurrentë”, tha Cvejiq.
Ai në mënyrë të veçantë i falënderoi të gjithë ata që ishin pjesë e manifestimit të sotëm – Kryqin e Kuq nga Graçanica dhe ekipet mjekësore të Shtëpive shëndetësore Ugarë dhe Graçanicë.
Krosi i Graçanicës “Nuk është bujë, është garë” u mbajt me mbështetjen e Komunës së Graçanicës, përmes programit “Ditët e Komunës së Graçanicës 2024 – Vera kulturore dhe argëtuese 2024”, i cili zbatohet nga CSD-ja në bashkëpunim me 12 organizata dhe shoqata të tjera.
