Sot u mbajt ngjarja e dytë “Magjia dhe aventurat e Pashkëve”, organizuar nga Organizata turistike e Graçanicës dhe Komuna e Graçanicës. Aktivitetin e vizitoi edhe kryetarja e Komunës së Graçanicës, prof. dr. Ljiljana Shubariq, me bashkëpunëtorët e saj.
Dhjetëra fëmijë nga e gjithë Komuna e Graçanicës morën pjesë sot në magjinë dhe aventurat e Pashkëve të organizuara për ta shënuar festën më të gëzueshme krishtere. Punëtoria artistike, në të cilën fëmijët shprehën krijimtarinë e tyre duke vizatuar dhe ngjyrosur vezët e Pashkëve, vazhdoi përmes lojërave dhe argëtimeve që shoqëruan këtë ngjarje.
Kryetarja e Komunës së Graçanicës, prof. dr. Ljiljana Shubariq, sot së bashku me drejtorët e drejtorive komunale e vizitoi ngjarjen dhe u uroi fëmijëve dhe prindërve festën e Pashkëve.
“Fryma krijuese festive ka rreth dhjetë ditë që po përhapet në të gjithë komunën tonë përmes ngjarjeve të ndryshme të organizuara nga institucionet tona arsimore. Më vjen mirë që në këtë ngjarje këtu sot, që po mbahet për të dytin vit radhazi, shoh një numër kaq të madh të fëmijëve që janë të lumtur dhe të buzëqeshur. Më kanë ndriçuar këtë ditë disi të vrenjtur, sepse shoqërimi me fëmijët është gjithmonë më i bukur. Qëllimi i kësaj ngjarjeje është që rëndësinë dhe gëzimin e Pashkëve t’ua afrojmë fëmijëve tanë”, tha kryetarja Shubariq.
Qëllimi i ngjarjes, e cila u mbajt në parkun tematik Ordo Drakonis, ishte edhe këtë vit, sipas kryetares së Organizatës turistike, Sandra Gjokiq, të mblidhte sa më shumë fëmijë nga të gjitha pjesët e Komunës së Graçanicës për t’u takuar, socializuar dhe shfaqur krijimtarinë e tyre përmes një punëtorie artistike dhe argëtuese.
“Fëmijët këtu kanë punëtoritë e tyre në të gjitha shkollat, por kjo punëtori është në një nivel pak më të lartë, ku ne duam t’i bashkojmë të gjithë fëmijët. Përveç kësaj aventure të Pashkëve, në javët në vijim kemi edhe një turne të pingpongut të Pashkëve që do të zhvillohet të enjten e ardhshme dhe kemi gjithashtu pjesëmarrës nga shkollat fillore dhe të mesme, është gjithashtu një vend ku ne do të përpiqemi t´i ndihmojmë fëmijët nga qytetet përreth të shoqërohen dhe të njihen më mirë me njëri-tjetrin”, tha Sandra Gjokiq.
Organizata turistike e Graçanicës dhe Komuna e Graçanicës kanë përgatitur dhurata të veçanta për të gjithë fëmijët.
