Turneu humanitar i punonjësve shëndetësorë “Luaj për buzëqeshjen e dikujt” përfundoi me ndeshjet finale në Gushtericën e Poshtme. Vendin e parë e fitoi ekipi i Shkollës teknike e elektrike nga Graçanica.
Në turneun përfundimtar mori pjesë edhe drejtori i Administratës së Komunës së Graçanicës, Nikolla Marinkoviq, të cilit iu dorëzua mirënjohje për mbështetjen e dhënë nga Komuna e Graçanicës në emër të qeverisjes lokale.
Komuna e Graçanicës përmes Drejtorisë së Arsimit dhe Kulturës ka siguruar pajisje sportive dhe rekuizita për turneun humanitar, i cili për të tretin vit radhazi po mbahet në sallën e mbyllur në Gushtericën e Poshtme.
“Komuna e Graçanicës është gjithmonë e lumtur që merr pjesë në ngjarje dhe i mbështet të gjitha ato ngjarje që synojnë të ndihmojnë dhe të tregojnë se ne kujdesemi për ata që janë në vështirësi. Gjithashtu besoj se mjetet e grumbulluara do të arrijnë në adresën e duhur”, tha Marinkoviq.
Vendin e parë në turneun e futbollit të vogël e fitoi ekipi i Shkollës së inxhinierisë elektrike, vendi i dytë i shkoi Shkollës së ndërtimtarisë e trafikut dhe i tretë ekipit të Shkollës mekanike.
Ekipet më të suksesshme morën medalje dhe kupa, ndërsa fituesi mori edhe një set fanellash. Organizatori ndau çertifikata falenderimi për të gjithë ata që ndihmuan dhe e mbështetën këtë turne.
Sipas drejtorit të Shkollës fillore “Knez Llazar” nga Gushterica e Poshtme, Dragan Maksimoviq, turneu ishte një mundësi për të ofruar mbështetje dhe ndihmë për ata që kanë më shumë nevojë, përveç shpirtit ekipor dhe dëshirës për të garuar.
“Ne të gjithë po dalim si fitues nga ky turne, jo vetëm për shkak të rezultateve në fushë, por edhe për mirësinë dhe bashkimin që kemi treguar. Mjetet që i kemi mbledhur në këtë turne arrijnë në 310 mijë dinarë dhe do t’i paguhen familjes Trajkoviq dhe familjes Milladinoviq. Le të na kujtojë ky turne se së bashku mund të bëjmë gjëra të mëdha”, tha Maksimoviq.
