Mbi 50 ekzaminime me ultratinguj dhe njëqind analiza hormonale dhe biokimike ishin rezultat i një fushate dyditore të ekzaminimeve parandaluese në kuadër të muajit të luftës kundër kancerit. Këtë herë theksi është te kontrolli i tiroides.
Punonjësit e Qendrës laboratorike-diagnostike, e cila funksionon në kuadër të Drejtorisë Komunale të Shëndetësisë dhe Mirëqenies Sociale, kanë kryer dje rreth njëqind analiza gjaku për hormonet e tiroides T3, T4, TSH, FT3 dhe FT4, si dhe analiza të plota biokimike. Fushata vazhdoi sot me ekzaminimet ekografike të gjëndrës tiroide të kryera te pacientët e interesuar nga radiologja dr. Mirjana Todoroviq.
Fushata parandaluese e ekzaminimit me ultratinguj zgjati deri në pasdite dhe u ekzaminuan gjithsej pesëdhjetë e dy pacientë të të gjitha moshave.
Sipas punonjësve, fushata u ndoq me një interes të madh nga shumica e grave, disa prej të cilave shprehën interes për ta kontrolluar statusin e tyre të hormoneve tiroide për herë të parë.
Dr. Mirjana Todoroviq ritheksoi edhe një herë se ekzaminimet parandaluese janë të një rëndësie të madhe sepse jetojmë në një mjedis ku stresi është i pranishëm në jetën e përditshme, ndërsa gjëndra tiroide është një nga organet që vuan më shumë nga stresi dhe ritmi i prishur i jetës dhe shtoi se metodat më të besueshme janë analizat hormonale të gjakut dhe ekzaminimi me ultratinguj.
Drejtoria e Shëndetësisë në Komunën e Graçanicës, e udhëhequr nga drejtoresha Zorica Milliq, do të vazhdojë edhe në periudhën e ardhshme me organizimin e ekzaminimeve parandaluese në fusha të ndryshme mjekësore, të cilat inkurajojnë kujdes më të madh për shëndetin e pacientëve dhe zbulimin dhe trajtimin e mundshëm të hershëm të malinjitetit.
