“Bota është më e pasur për shkak të diversitetit që e përbën atë, sepse arti i vërtetë nuk krijohet në kushte të përsosura, por kur një person vendos të besojë në vetvete pavarësisht gjithçkaje”, ishte mesazhi i përcjellë sot në hapjen e ekspozitës së pestë humanitare-shitjeje të punimeve nga punëtoria e qeramikës për personat me aftësi të kufizuara, e cila u hap në Shtëpinë e kulturës.
Paratë e mbledhura në ekspozitë do t’i paguhen institucionit social “Shtëpia e të rinjve” nga Graçanica, ndërsa ky aktivitet humanitar u mbështet nga drejtorët komunalë së bashku me kryetarin e Komunës së Graçanicës, Novak Zhiviq.
Menaxherja e Shtëpisë së të rinjve, Jellena Marinkoviq, i falënderoi të gjithë ata që erdhën për ta mbështetur këtë ekspozitë humanitare.
“Këtu arti bëhet një urë lidhëse midis njerëzve, midis mirëkuptimit dhe pranimit, midis asaj që mendojmë se dimë dhe asaj që duhet të mësojmë. Na kujton se çdo person është i vlefshëm, i dukshëm dhe i rëndësishëm. I kemi një borxh të veçantë mirënjohjeje Komunës së Graçanicës, e cila e njohu rëndësinë e këtij institucioni dhe e mbështet punën e tij”, tha Marinkoviq.
Përveç kryetarit të Komunës së Graçanicës, Novak Zhiviq, kjo ekspozitë humanitare u mbështet edhe nga drejtorët e drejtorive komunale si dhe vizitorët e shumtë.
Ndër ata që kujdesen për banorët e “Shtëpisë së të rinjve” në Graçanicë çdo ditë është edhe Drejtoria Komunale e Shëndetësisë dhe Mirëqenies Sociale, ndërsa drejtoresha e kësaj drejtorie, Zorica Milliq, i uroi pjesëmarrësit e punëtorisë për krijimin e veprave unike të qeramikës dhe u uroi atyre një ekspozitë të suksesshme. Ajo premtoi se Komuna e Graçanicës dhe drejtoria që ajo e drejton do të vazhdojnë të jenë mbështetja dhe përkrahja e tyre, sepse pavarësisht sfidave të shumta personale të përditshme me të cilat përballen të gjithë përdoruesit e Shtëpisë së të rinjve, ata po punojnë për ndërtimin e vlerave të tyre dhe shoqërisë në të cilën jetojnë.
Ndërmarrja sociale nga Graçanica siguroi pajisje gjatë punëtorisë për prodhimin e objekteve, ndërsa dyqani i pavarur i artizanatit “Amfora” nga Rahoveci ndihmoi në pjekjen përfundimtare të objekteve. Master artiste – skulptore dhe asistente mësimdhënëse në lëndën e Metodave të mësimdhënies së arteve të bukura në Fakultetin e Arteve në Zveçan, Jullija Dubovac, punoi me përdoruesit e “Shtëpisë së të rinjve” në krijimin e objekteve dhe e hapi zyrtarisht ekspozitën në Shtëpinë e kulturës.
