Në prani të mysafirëve, Dita e Komunës së Graçanicës u shënua sot me Akademinë solemne në Shtëpinë e kulturës së Graçanicës. U transmetua një film dokumentar për punën e Komunës së Graçanicës. U prezantua edhe libri mbi punën vjetore të qeverisjes lokale, individëve dhe organizatave të merituara iu ndanë çmime, si dhe u organizua një program i veçantë kulturor dhe artistik.
Akademia solemne në Shtëpinë e kulturës së Graçanicës u bekua nga peshkopi i Rashkës dhe Prizrenit dhe i Kosovës e Metohisë, Teodosije, i cili foli për rëndësinë e festës. Ai dërgoi një mesazh për rëndësinë e ruajtjes së gjithçkaje që ne, siç tha ai, e kemi trashëguar nga paraardhësit tanë”.
“Komuna jonë, këtu në Graçanicë, së bashku me Dioqezën e Rashkës e Prizrenit dhe popullin besimtar, ruan ato vlera që na përcaktojnë, atë që ishim, atë që jemi dhe atë që duhet të mbetemi përgjithmonë. Para së gjithash, duhet të jemi në unitet me Zotin dhe pastaj do të jemi edhe në unitet me njëri-tjetrin në mënyrë që t’i përmbushim si pritjet e Zotit ashtu edhe pritjet e popullit. Ne jemi të thirrur ta përmbushim atë që është detyra jonë dhe atë që mundemi, duke mos u mbështetur vetëm në forcën tonë, por mbi të gjitha në ndihmën e Zotit dhe forcën e unitetit”, tha peshkopi Teodosije në predikimin e tij në Akademinë solemne.
Kryetarja e Komunës së Graçanicës, prof.dr. Ljiljana Shubariq, duke i përshëndetur të gjithë të pranishmit, i uroi qytetarët Ditën e Komunës dhe tha se Graçanica mbetet një simbol i këmbënguljes, forcës dhe shpresës.
“Mbështetja dhe besimi juaj janë të endura në çdo rrugë që është ndërtuar, në çdo shkollë dhe kopsht, në çdo ndihmë për familjet, studentët dhe fermerët tanë. Pa të, asnjë projekt i yni, asnjë vendim i vetëm, asnjë fitore e vetme nuk do të ishte e mundur. Populli ynë në Kosovë dhe Metohi jeton në një tokë që është e shenjtë, por edhe e vështirë për t’u jetuar. Kjo është arsyeja pse çdo arritje e jona ka vlerë më të madhe sepse është arritur në kushte që kërkojnë forcë, durim dhe besim. Këto janë vlerat që na mbajnë dhe që duhet t’i ruajmë. Sot, dua të shpreh mirënjohjen time të thellë për besimin dhe mbështetjen tuaj në unitetin tonë. Ju jeni forca e kësaj komune. Ju jeni arsyeja pse punojmë dhe luftojmë. Teksa mandati im si kryetare e komunës po mbaron, dëshira ime më e madhe është që politika e vazhdimësisë të vazhdojë, një politikë që nuk shkakton ndërprerje të papritura dhe të dëmshme, por përkundrazi ndërton, shton dhe forcon atë që është filluar. Një politikë që ka në qendër qytetarët dhe përmirësimin e tyre, jetën e tyre, jo interesat personale. Një politikë që merr parasysh mbijetesën dhe të ardhmen e popullit tonë në këtë zonë”, tha kryetarja e Komunës së Graçanicës, prof. dr. Ljiljana Shubariq, dhe i uroi të gjithë qytetarët e Komunës së Graçanicës për festën.
Në emër të të ftuarve, të pranishmit përshëndeti kryetarja e Kuvendit Komunal të Beranës, Vida Ivanoviq. Ajo përcolli emocionet e saj në fjalën e saj sepse, siç tha ajo, lindi në Prishtinë dhe sot, pas 26 vitesh, është përsëri në Graçanicë.
“Kam lindur në Prishtinë, jetova në Prishtinë dhe pas 26 vitesh shkela përsëri në këtë tokë të shenjtë në qytetin tim të lindjes, qytetin e fëmijërisë dhe rinisë sime. Është e vështirë të përshkruhen me fjalë emocionet që mbaj. Ky është një kthim në rrënjët tona, një ripërtëritje shpirtërore dhe një kujtesë se kush jemi dhe ku i përkasim. Graçanica nuk është vetëm një komunë, është një simbol i këmbënguljes së popullit serb, një dëshmi e besimit dhe spiritualitetit. Sot, më shumë se kurrë, është e rëndësishme të jemi të bashkuar, t’u ofrojmë mbështetje popullit tonë serb që jeton këtu, duke e ruajtur vatrën e tyre”, tha Ivanoviq.
U shfaq një film dokumentar për aktivitetet e Komunës së Graçanicës, prodhuar nga RTV Graçanica, i ndjekur nga ndarja e çmimeve për organizatat dhe individët që e meritojnë, ndërsa Srboljub Mitiq u vlerësua me një certifikatë për kontributin e tij vetëmohues dhe punën e jashtëzakonshme në Komunën e Graçanicës.
