Në ndërtesën e Komunës së Graçanicës u mbajt mbledhja e shtatë e rregullt e Komitetit për Komunitete.
Kryesuesi Aziz Karadollami i njoftoi anëtarët e komitetit me rendin e ditës, ku pastaj u miratua procesverbali nga mbledhja e gjashtë e rregullt e mbajtur në fillim të shtatorit të këtij viti.
Si në mbledhjet e kaluara, është dhënë informacioni për gjendjen aktuale në komunë, për të cilën ka folur Millosh Zhivkoviq, zyrtar i Stacionit policor në Graçanicë. Ai tha se situata në përgjithësi është e qetë, se në muajin e kaluar, që nga mbledhja e fundit e Komitetit për Komunitete, nuk ka pasur vepra penale.
“Numri i aksidenteve në komunikacion është rritur, më së shpeshti për shkak të përdorimit të telefonit mobil gjatë vozitjes. Dëshiroj ta tërheq vëmendjen për problemin, gjegjësisht praninë e të miturve në diskotekë, prandaj u bëj thirrje organeve inspektuese që të merren me këtë problem”, tha Zhivkoviq.
Drejtori i Drejtorisë së Buxhetit dhe Financave, Sllavisha Niçiq, para anëtarëve të Komitetit për Komunitete e prezantoi shkurt buxhetin komunal për vitin 2025 dhe projeksionet buxhetore për vitin 2026 dhe 2027.
Drejtoresha e Urbanizmit, Alleksandra Gjekiq, iu përgjigj pyetjeve të anëtarëve të komitetit, të cilët ishin më të interesuar për stacionin e autobusit në Llapllasellë. Ajo tha se stacioni i autobusit është i shënuar dhe se është vendosur një tabelë që është e destinuar për autobusët nga ora 07:00 deri në 14:00.
Ajo tha se faza e parë e rindërtimit të trotuarit në Graçanicë ka përfunduar dhe se punimet aktuale janë në fazën e dytë.
Informatat për fillimin e vitit shkollor i ka dhënë drejtoresha e Arsimit dhe Kulturës, Brankica Niçiq, e cila tha se ka filluar pa probleme të mëdha sipas planeve dhe programeve të përcaktuara. Ajo shtoi se shkollat janë të gatshme për sezonin e ngrohjes dhe se drejtoria është e gatshme të ndihmojë aty ku nevojitet kjo ndihmë.
