Në mbledhjen e tetë të rregullt të Kuvendit të Komunës së Graçanicës asamblistët e miratuan raportin nëntëmujor financiar.
Në mbledhje u miratua Rendi i ditës paraprakisht t’i plotësuar në mbledhjen e tetë të rregullt të Komitetit për Politikë dhe Financa. Pastaj u miratua procesverbali nga mbledhja e katërt të jashtëzakonshme, e mbajtur më datën 25 tetor, ku më pas u miratua edhe raporti nëntëmujor financiar për vitin 2024.
Atë e prezantoi drejtori i Drejtorisë së Buxhetit dhe Financave, Sllavisha Niçiq, i cili tha se buxheti i Komunës për tremujorin e tretë të vitit 2024 është 10.092.630 euro, prej të cilave ndarja e mjeteve në vlerë prej 8.729.139 euro është bërë për nëntë muaj.
“Për nëntë muaj janë shpenzuar 6,619,858 euro ose 65,59% e buxhetit të përgjithshëm, pra 75,84% e mjeteve të ndara për gjashtë muaj. Janë realizuar të hyrat në një shumë prej 2,306,271 euro ose 107,71% e të hyrave vetanake të planifikuara për vitin 2024”, ka thënë Niçiq.
Sipas rendit të ditës, asamblistët janë dashur të diskutojnë për subvencionet e këtij viti në bujqësi, kërkesën e NPK “Ekologjia” Sh.A. që t’u lejohet shfrytëzimi i lokaleve afariste në Qendrën tregtare në Graçanicë dhe kërkesën për ndryshimin e emrave të tri rrugëve.
Duke qenë se propozuesit mungonin, gjë që shkaktoi pakënaqësi te asamblistët, u vendos që këto kërkesa të diskutohen në mbledhjen e radhës. Nga kryesuesi i Kuvendit, Millan Dimitrijeviq, është kërkuar që të insistojë që në mbledhjet të marrin pjesë drejtorët e drejtorive komunale, në mënyrë që ata të kenë mundësi t’u bëjnë pyetje, siç thanë ata, për disa probleme që duhet të zgjidhen urgjentisht.
Asamblistët ishin të interesuar se çfarë është bërë kundër vendimit të Qeverisë së Kosovës për ndërtimin e “Qendrës rezidenciale të Kosovës për autizëm, sindromë daun dhe aftësi të kufizuar për fëmijë, persona të rritur dhe të moshës së shtyrë”, me të cilën iu konfiskohet toka Komunës së Graçanicës.
Kryesuesi i Kuvendit të Komunës së Graçanicës, Millan Dimitrijeviq, i njoftoi të pranishmit se Komuna e Graçanicës ka ngritur padi kundër Qeverisë së Kosovës për anulimin e aktit administrativ me propozim për pezullimin e ekzekutimit të vendimit nr. 05/218 të datës 28.08.2024 para Gjykatës Themelore në Prishtinë.
