Uji nga liqeni i Badocit është sërish i sigurt dhe mund të përdoret për pije, njofton Instituti i Shëndetësisë Publike të Kosovës.
Siç është bërë e ditur, Instituti për Shëndetin Publik e ka kontrolluar rregullisht korrektësinë e ujit të pijshëm që shfrytëzohet nga Liqeni i Badocit (Liqeni i Graçanicës) përmes Ujësjellësit Rajonal “Prishtina”.
“Rezultatet e analizave të katër ditëve të fundit – të premten, të shtunën, të dielën dhe të hënën, tregojnë se vlerat e manganit kanë zbritur dhe ato rezultojnë brenda standardeve të paraqitura për ujin e pijes.”.
„ Bazuar në këto rezultate, uji mund të përdoret edhe për pije “, theksohet në njoftim.
Instituti për Shëndetin Publik falënderon qytetarët për mirëkuptimin e treguar gjatë periudhës kur uji nuk mund të përdoret për pije, për shkak të pranisë së shtuar të manganit dhe thekson se do të vazhdojë me monitorimin e rregullt të cilësisë së ujit.
