Të premten, diskutimi i fundit publik u mbajt në Shtëpinë e kulturës në Graçanicë me banorët e Graçanicës, Sushicës, Kishnicës dhe Badovcit të Ri, si pjesë e procesit të planifikimit të buxhetit të Komunës së Graçanicës për vitin 2027. Qytetarët patën mundësinë t‘i paraqesin propozimet dhe prioritetet për investime kapitale që i konsiderojnë më të rëndësishme për zhvillimin e komuniteteve të tyre.
Si prioritetet e përbashkëta në të gjitha vendbanimet ishin përmirësimi i infrastrukturës rrugore, ndërtimi dhe rindërtimi i trotuareve, përmirësimi i ndriçimit publik, instalimi i video-mbikëqyrjes, ndërtimi dhe rregullimi i këndeve të lojërave për fëmijë, si dhe zgjidhja e problemeve të rrjetit të kanalizimit dhe problemeve të tjera komunale.
Banorët e Sushicës theksuan veçanërisht nevojën për rindërtimin e Shtëpisë së kulturës, si dhe rehabilitimin e çatisë së Shkollës fillore “Shën Sava”. Deponitë e paligjshme të mbeturinave duhet të hiqen sa më shpejt të jetë e mundur dhe duhet të rregullohet parku për fëmijë.
Sipas mendimit të banorëve që ishin të pranishëm në diskutimin publik është e nevojshme të ndërtohen shtigjet për këmbësorë për Graçanicën, të rregullohen hapësirat publike, duke përfshirë oborrin e shtëpisë së kulturës, si dhe të ndërtohet një garazh publik.
Është propozuar ripyllëzimi i mbetjeve minerare “Djerrina”. Është kërkuar ndarja e më shumë mjeteve për shërbimet sociale dhe ndërtimi i një tregu të mbyllur, si dhe është kërkuar përfundimi i punimeve për lidhjet e ujit dhe energjisë elektrike për kapelën e sapondërtuar.
Banorët e Kishnicës kërkuan rregullimin e rrugës për në varrezat e vjetra, ndërtimin dhe rregullimin e parqeve dhe këndit të lojërave për fëmijë, rindërtimin e rrugëve, përmirësimin e ndriçimit publik dhe zgjidhjen e rrjetit të kanalizimit.
Në Badovcin e Ri theksi u vu në ndërtimin e trotuareve dhe këndeve të lojërave, instalimin e sistemit të video-mbikëqyrjes dhe vendosja e policëve të shtrirë për ta rritur sigurinë në trafik.
Diskutimi publik me qytetarët në Graçanicë për planifikimin e buxhetit të investimeve kapitale të Komunës së Graçanicës për vitin 2027 ishte i fundit i organizuar.
Grupi punues për hartimin e buxhetit do t’i shqyrtojë të gjitha kërkesat e banorëve dhe do të veprojë sipas planit për investime të balancuara në projektet prioritare.
Komuna e Graçanicës i falënderon të gjithë banorët që ndanë kohë për të marrë pjesë në diskutimet publike të organizuara ditët e fundit për t’i paraqitur propozimet e tyre për përmirësimin e jetës në komunitetet e tyre.
