Komuna e Graçanicës shënoi Ditën Botërore të Mjedisit – 5 Qershorin me aktivitete që synonin ndërgjegjësimin e të rinjve për rëndësinë e ruajtjes së natyrës dhe mjedisit. Gjithashtu u rregullua edhe pushimorja “Çesma” në afërsi të Graçanicës.
Me rastin e Ditës Botërore të Mjedisit u organizua vizita në Qendrën e shkollave të mesme në Llapllasellë, ku nxënësve iu shpërndanë bluzat, kapelet dhe çantat promovuese me mesazhin dhe logon “Ta ruajmë planetin”, me qëllim që të rinjve t’u tregohet rëndësia e përgjegjësisë ndaj mjedisit.
Aksioni u zbatua nga Drejtoria e Urbanizmit dhe Mbrojtjes së Mjedisit e Komunës së Graçanicës, së bashku me Drejtorinë e Rinisë dhe Sportit, në bashkëpunim me Organizatën turistike të Graçanicës.
Drejtoresha e Drejtorisë së Urbanizmit dhe Mbrojtjes së Mjedisit, Alleksandra Gjekiq, theksoi se qëllimi i aktivitetit të sotëm ishte zhvillimi i ndërgjegjësimit e të rinjve për rëndësinë e ruajtjes së natyrës dhe hapësirës së jetesës.
“Përmes aktiviteteve të tilla, ne përpiqemi ta zhvillojmë ndërgjegjësimin mjedisor dhe t’i inkurajojmë qytetarët, veçanërisht të rinjtë, që të kontribuojnë në ruajtjen e mjedisit me sjelljen e tyre”, tha Gjekiq.
U rregullua pushimorja “Çesma”
Pas vizitës së Qendrës së shkollave të mesme në Llapllasellë, përfaqësuesit e drejtorive komunale vizituan edhe pushimoren “Çesma”, ku morën pjesë në aksionin e pastrimit të këtij vendi.
Me këtë rast u mblodh dhe u largua një sasi e madhe e mbeturinave, ndërsa punonjësit e Ndërmarrjes publike-komunale “Ekologjia” kositën dhe rregulluan të gjithë zonën. Për të përmirësuar dhe gjelbëruar vendin u mbjellën dhjetë pemë rrapi.
Gjatë aktivitetit u theksua rëndësia e ruajtjes së lokaliteteve natyrore, mirëmbajtjes së rregullt të hapësirave publike dhe përgjegjësisë ndaj mjedisit.
