Banorët e këtyre katër vendbanimeve propozimet e tyre ua paraqiten përfaqësuesve të Komunës së Graçanicës në diskutimin publik të mbajtur në Shtëpinë e kulturës në Gushtericën e Poshtme, ku këta të fundit premtuan se së pari do të zgjidhen problemet më prioritare.
Kryesuesja e Kuvendit komunal të Graçanicës, Brankica Kostiq, edhe një herë përsëriti se prezantimet publike po organizohen në mënyrë që banorët e fshatrave të bisedojnë për mundësitë e ndarjes së parave të cilat Komuna e Graçanicës i ka në disponim për vitin 2016. Është theksuar se buxheti për vitin e ardhshëm është punuar në bazë të regjistrimit të fundit të popullsisë, sipas të cilit Komuna e Graçanicës ka pak më shumë se 10 mijë banorë.
Drejtori i Financave, Slavisha Niçiq, tha se buxheti i Komunës së Graçanicës për vitin 2016 është 5.976.502 еuro, ku nga kjo shumë 2.530.479 euro janë ndarë për projekte kapitale, ndërsa të tjerat janë ndarë për paga dhe mëditje dhe shpenzime operative.
Drejtori i Urbanizmit, Dejan Jovanoviq, tha se në bazë të kërkesave të arritura projektet më prioritare kanë të bëjnë me zgjidhjen e problemeve themelore dhe përkujdesjen e personave të rrezikuara sociale për çka janë siguruar mjetet në një shumë prej 600.000 еuro.
„Kjo nënkupton investimet në infrastrukturën rrugore dhe zgjidhjen e problemit me kanalizim. Kemi shumë kërkesa për marrjen e ndihmës në formë të materialit ndërtimor. Shumë familje nuk po munden me siguru një çati mbi kokë apo nuk kanë parcelë, që na ka shtyrë për ta hartuar kartën sociale të banimit me qëllim të krijimit e një baze të dhënave, në bazë të cilës do ta dimë për sa njësi të reja të banimit dhe ndërtesa për kujdesin e personave të rrezikuar social, çifteve të reja dhe personave të zhvendosur kemi nevojë, si dhe për sa mjete kemi nevojë për material ndërtimor“, tha Jovanoviq.
Ai theksoi se Komuna e Graçanicës në të gjitha vendbanimet ka investuar në bazë të kërkesave të banorëve, siç është rikonstruktimi i shkollave dhe shtëpive të kulturës, ndërtimi i parqeve dhe shtigjeve, qendrave arsimore, ku pas përmbytjeve pranverore pushteti lokal gjithashtu i ka rehabilituar shtretërit e lumenjve në këto fshatra.
Drejtoresha e Arsimit, Kulturës, Rinisë dhe Sportit, Gordana Toskiq, theksoi se buxheti për këtë sektor në krahasim me vitin 2015 u rrit dhe u bëri thirrje banorëve që t’i japin propozimet e tyre për të investuar me paratë që janë në dispozicion. Ajo theksoi se në këtë vit edhe në vitin e kaluar janë rikonstruktuar të gjitha shkollat, si dhe që Komuna e Graçanicës ka investuar shumë edhe në kulturë dhe sport. Një pjesë e buxhetit do të ndahet edhe në sektorin e shëndetësisë.
Banorët e Gushtericës së Epërme dhe të Poshtme, Dobratinit dhe Livagjës dhanë disa propozime për të investuar me paratë që janë në dispozicion për vitin e ardhshëm, ndërsa si prioritete më të mëdha i theksuan ugjidhjen e rrjetit të kanalizimit dhe ujësjellësit, mirëmbajtjen e infrastrukturës ekzistuese dhe ndërtimin e asaj të re, asfaltimin e rrugëve të fshatit, zgjerimin e varrezave lokale dhe të ngjashme. Ata e kanë përkrahur propozimin për përkujdesjen dhe ofrimin e ndihmës për familjet e rrezikuara sociale, që nënkupton ndërtimin e njësive të banimit dhe mdihmën në formë të materialit ndërtimor.
Problemet e cekura, përveç me buxhet, do të zgjidhen edhe me veprimin e këshillave lokale, ndërsa themelimi i tyre ishte gjithashtu tema e diskutimit publik.
Drejtori i Administratës, Zvonko Stankoviq, shpjegoi se bëhet fjalë për Rregulloren për bashkëpunim të komunës me fshatrat dhe vendbanimet, të cilën për herë të parë po e miraton Komuna e Graçanicës që nga themelimi i saj.
„Komitetet lokale do të zëvendësohen me këshillat lokale të përbëra nga pesë anëtarë dhe një kryetar. Gjithsej do të formohen 19 këshilla dhe puna e tyre do të jetë pa kompenzim. Komuna do të ofrojë përmes Komisionit të tij vetëm mbështjete teknike në organizimin e zgjedhjeve, numërimin e votave dhe shpalljen e rezultateve“, tha Stankoviq.
Rikonstruktimi i rrjetit të kanalizimit dhe ujësjellësit, mirëmbajtja më e mirë e parqeve dhe infrastrukturës ekzistuese janë kërkesat kryesore të cilat banorët e Gushtericës së Poshtme dhe të Epërme, Dobratinit dhe Livagjës përmes të cilave ata kërkuan që të zgjidhen me buxhetin e Komunës së Graçanicës për vitin 2016.
