Mbledhja e tretë e jashtëzakonshme e Këshillit Komunal për Siguri në Bashkësi, të udhëhequr nga kryetarja e Komunës së Graçanicës, prof.dr. Ljiljana Shubariq, filloi sot me një minut heshtje për viktimën M.Zh. nga Gushterica e Poshtme, e cila ndërroi jetë nga lëndimet e rënda si pasojë e dhunës në familje.
Në mbledhjen e Këshillit Komunal për Siguri, e cila është thirrur me kërkesë të kryetares së komunës për shkak të vrasjes së bashkëqytetarës dhe rritjes së dhunës në familje në territorin e Komunës së Graçanicës, ku mori pjesë edhe këshilltari i kryetares së komunës për komunitete pakicë, Sasha Daniq, u është dërguar thirrje të gjithë qytetarëve, veçanërisht grave, që të mos hezitojnë ta raportojnë çdo lloj dhune në familje, madje edhe kërcënime, në mënyrë që rasti nga Gushterica e Poshtme të mos përsëritet më.
“Sipas rregullit të pashkruar viktimat e dhunës në familje janë gjithmonë femrat dhe dua t’i inkurajoj të gjitha që ta kontaktojnë Policinë, Zyrën për Barazi Gjinore të Komunës së Graçanicës, Këshillin Komunal për Siguri dhe mua për ta luftuar dukurinë e tillë dhe parandaluar shkallën e dhunës në familje, e cila sipas raporteve të policisë dhe të dhënave të Qendrës sonë për Punë Sociale në Llapllasellë, ka një tendencë të rritjes në territorin e Komunës së Graçanicës”, tha Shubariq dhe i prezantoi të dhënat e Qendrës për Punë Sociale lidhur me angazhimin dhe punën në këtë çështje.
Si dhe përfaqësuesit e Stacionit policor në Graçanicë, pasi që i kanë prezantuar detajet lidhur me rastin e vrasjes së M.Zh. nga Gushterica e Poshtme, i ftuan të gjithë që t’i raportojnë rastet e dhunës në familje, e cila mund të bëhet edhe në mënyrë anonime përmes telefonit në numrin 192, në mënyrë që të reagohet sa më shpejt dhe të ndihmohen viktimat. Ata përkujtojnë se Komuna e Graçanicës nuk është rast i izoluar në këtë problem dhe se kjo dukuri është e pranishme edhe në komunat tjera.
Në Stacionin policor në Graçanicë, siç thuhet, ekziston një dhomë e veçantë ku akomodohen viktimat e dhunës në familje deri në përfundim të procedurës parahetuese, me të cilët vetëm zyrtarët e Qendrës për Punë Sociale të ngarkuar për dhunën në familje mund të kenë kontakt.
Krysuesja e Këshillit për Siguri në Bashkësi, prof. dr. Ljiljana Shubariq, tha se Komuna e Graçanicës është e gatshme t’i ndihmojë në nivel institucional të gjithë ata që vuajnë nga çfarëdo forme dhune, që të jetë një hallkë dhe lidhje me organet kompetente, por edhe për ta zgjidhur problemin me ndihmën e shërbimet e saj që merren me këtë çështje. Ajo përkujtoi se në vitin 2019 është nënshkruar një memorandum me 15 organizata, institucione dhe shoqata të tjera që duhet të merren me këtë çështje.
“Jam plotësisht dakord që së bashku mund të bëjmë shumë më tepër, por edhe që përgjegjësia e të gjithëve është e barabartë dhe kjo është e vërteta absolute. Përmes mbledhjeve të Këshillit Komunal për Siguri, së bashku me policinë, kemi paralajmëruar për shtim të rasteve të dhunës në familje në territorin e komunës sonë. Ju rikujtoj se për dhunën në familje mësojmë ekskluzivisht nga raportet e policisë dhe nga Qendra jonë për Punë Sociale ose nga mediat. Prandaj ne reagojmë në bazë të pritjeve dhe kërkesave të qytetarëve dhe institucioneve dhe këtë problem e trajtojnë shërbimet brenda dhe jashtë komunës që janë përgjegjëse për të dhe nuk kemi mundësi të bëjmë vlerësime psikologjike të familjeve në të cilat asnjë formë e dhunës nuk është raportuar ndonjëherë, siç ishte rasti në Gushtericën e Poshtme”.
“Një jetë humbi në mënyrë të pakthyeshme. Të bëjmë gjithçka që kjo të mos ndodhë më”, tha kryetaja e Komunës së Graçanicës, prof. dr. Ljiljana Shubariq.
Në mbledhjen e tretë të jashtëzakonshme të Këshillit për Siguri në Bashkësi morën pjesë edhe përfaqësuesit e KFOR-it, EULEX-it, Karabinierëve Italianë, OSBE-së dhe UNMIK-ut.
