Kirurgjia endoskopike invazive minimale së shpejti do të bëhet pjesë integrale e punës së Klinikës gjinekologjike në Graçanicë dhe diagnostikimit në Qendrën klinike spitalore falë shtyllës moderne endoskopike të dhuruar këtij institucioni shëndetësor nga Komuna e Graçanicës.
Kryetarja e Komunës së Graçanicës, prof.dr. Ljiljana Shubariq, së bashku me drejtoreshën e Drejtorisë Komunale për Shëndetësi dhe Mirëqenien Sociale, Zorica Milliq, e vizituan sot Repartin e gjinekologjisë në Graçanicë, të cilit i është dorëzuar shtylla endoskopike në vlerë rreth 100 mijë euro.
Me atë rast, kryetarja Shubariq tha se Komuna e Graçanicës vazhdon të investojë në vazhdimësi në punën e Qendrës klinike spitalore në Graçanicë dhe në sistemin shëndetësor në përgjithësi, si përmes aparaturave dhe materialeve shpenzuese moderne dhe të nevojshme. Ajo tha se shtylla endoskopike është blerë përmes Drejtorisë Komunale të Shëndetësisë në bazë të kërkesës së punonjësve dhe drejtorëve të QKS-së.
“Sot erdhëm për ta vizituar QKS-në në Graçanicë për të biseduar me punonjësit për të parë se me çfarë sfidash përballen dhe e sollëm aparatin që e kemi blerë me kërkesë të stafit të Gjinekologjisë dhe drejtorit të Qendrës klinike spitalore. Bëhet fjalë për shtyllën endoskopike me laparoskop dhe histeroskop. Reparti ynë i gjinekologjisë dhe obstetrikës e meriton një pajisje të tillë dhe besoj se aparati ka ardhur në duart e duhura dhe do t’i shërbejë qëllimit të tij, që do të thotë se mund të përdoret si për qëllime diagnostikuese ashtu edhe për qëllime terapeutike dhe besoj se do të bëjë që puna e mjekëve të lehtësohet dhe pacientëve u sigurohet një diagnozë e mirë. Sa i përket qeverisjes sonë lokale, ne do të vazhdojmë ta përmirësojmë sistemin tonë shëndetësor me ritme më të shpejta si më parë. Mbetemi të hapur për investime të mëtutjeshme”, tha kryetarja e Komunës së Graçanicës.
Drejtori i QKS-së, Bratisllav Llaziq, tha se QKS-ja ka personel që mund të punojë me këtë aparat, por do të jetë e nevojshme, siç tha ai, “që i gjithë ekipi të formohet plotësisht në një periudhë të shkurtër kohore në mënyrë që të përdoret në nivel maksimalisht të lartë”
“Kjo pajisje mundëson procedurat kirurgjikale gjinekologjike që janë një opsion modern në mjekësi. Përveç diagnostikimit cilësor, shumë gjëra mund të bëhen në një mënyrë më të lehtë kur bëhet fjalë për pacientët. Pacientët e trajtuar në këtë mënyrë nuk qëndrojnë gjatë në spital, gjë që në një farë mënyre lehtëson sistemin shëndetësor. Pajisja është e një cilësie shumë të mirë dhe mund të përdoret në shumë aspekte, kur bëhet fjalë për degët kirurgjikale, kështu që ne jemi shumë të kënaqur me këtë dhe do të sigurohemi që pajisja të vihet në përdorim dhe të përdoret për të mirën e popullatës sonë që gravitojnë drejt Qendrës sonë klinike spitalore”, tha Llaziq në një deklaratë për mediat.
Kryetarja e Komunës së Graçanicës, prof.dr. Ljiljana Shubariq ka bërë të ditur se për më pak se dy muaj do të arrijë një autoambulancë, e cila është blerë me kërkesë të Shtëpisë së shëndetit në Graçanicë.
