Drejtoria e Rinisë dhe Sportit dhe ajo e Arsimit dhe Kulturës së Komunës së Graçanicës ka siguruar dhe ndarë rekuizita sportive për shkollat fillore dhe të mesme në territorin e qeverisjes lokale.
Shpërndarja u bë në Kompleksin sportiv në Graçanicë, ndërsa rekuizitat janë shpërndarë për përfaqësuesit e shkollave nga drejtori i Rinisë dhe Sportit, Strahinja Aritonoviq dhe drejtoresha e Arsimit dhe Kulturës, Brankica Niqiq, në prani të zëvendëskryetarit të Komunës së Graçanicës, Igor Aritonoviq.
Të gjitha shkollat fillore dhe të mesme morën pajisje të nevojshme në formën e topave për futboll, volejboll, basketboll, hendboll. U siguruan edhe pajisje atletike, pajisje të plota për pingpong me disa tavolina, kone, kronometër, bilbila, komplete fanellash dhe shumë pajisje të tjera të nevojshme për të përmirësuar aktivitetet shkollore.
Drejtori i Rinisë dhe Sportit, Strahinja Aritonoviq, shpjegoi se si Komuna doli me idenë e mbështetjes së shkollave me pajisje sportive. Ai theksoi se beson se ato do të kontribuojnë në zhvillimin e sporteve dhe do t’i motivojnë nxënësit të angazhohen në më shumë aktivitet fizik.
“Kur i vizituam shkollat fillore në fillim të vitit, pamë se shumë prej tyre kishin mungesë të pajisjeve bazë sportive. Kjo është arsyeja pse vendosëm t’i mbështesim të gjitha shkollat në komunë. Besoj se pajisjet që kemi siguruar do të kenë shumë vlerë për mësuesit e edukimit fizik dhe do ta bëjnë punën e tyre më të lehtë, duke u ofruar fëmijëve kushte më të mira për ushtrime dhe sporte”, tha Aritonoviq.
Drejtoresha e Drejtorisë së Arsimit dhe Kulturës, Brankica Niqiq, theksoi rëndësinë e mbështetjes së vazhdueshme për shkollat.
“Edhe pse sot bie shi, ne u mblodhëm për një ngjarje të bukur. Ne siguruam atë që shkollat kërkuan dhe atë që ne ishim në gjendje të siguronim dhe kështu i plotësuam plotësisht nevojat e tyre. Komuna e Graçanicës ka treguar në vitet e kaluara se mbështet vazhdimisht arsimin – nga ndërtimi dhe rindërtimi i objekteve deri te pajisja e shkollave. Ne do të vazhdojmë t’i ndihmojmë institucionet arsimore në të njëjtën mënyrë në periudhën e ardhshme”, tha drejtoresha Niqiq.
Përfaqësuesit e shkollave e falënderuan Komunën e Graçanicës për pajisjet e vlefshme dhe shumë të rëndësishme.
“Rekuizitat sportive për shkollën tonë janë një mjet i rëndësishëm mësimor për edukimin fizik. Ato mundësojnë një punë më cilësore dhe krijojnë kushte më të mira për fëmijët tanë. Në ditët e sotme, është veçanërisht sfiduese të motivohen nxënësit të merren me më shumë sporte, të jenë më aktivë dhe të kalojnë më pak kohë me telefona dhe kompjuterë. Kjo është arsyeja pse këto pajisje kanë shumë rëndësi për ne, na ndihmojnë që fëmijët të kalojnë më shumë kohë në fushat sportive”, tha drejtori i Shkollës së Mjekësisë, Miodrag Zhiviq.
“Me këtë donacion, Komuna ka treguar se vazhdon të kujdeset për shkollat në territorin tonë. Edhe pse jemi një shkollë e muzikës, kemi një pjesë të sallës që e përdorim për aktivitete sportive, kështu që këto pajisje do të jenë me dobi të konsiderueshme për ne. Edhe një herë, dua ta falënderoj Komunën e Graçanicës për donacionin dhe shpresoj që bashkëpunimi ynë i suksesshëm të vazhdojë në të ardhmen”.
Drejtoria e Sportit dhe Rinisë njoftoi se këto dhe aktivitete të ngjashme do të vazhdojnë në periudhën e ardhshme me qëllim të forcimit të sporteve në shkolla dhe promovimin e stileve të jetesës së shëndetshme tek të rinjtë.
