Komuna e Graçanicës dhe Organizata joqeveritare “Forumi për Zhvillim dhe Bashkëpunim Multietnik (FDMC)” kanë nënshkruar Memorandum të mirëkuptimit dhe bashkëpunimit, i cili përcakton kornizën për veprim të përbashkët për përmirësimin e të drejtave të fëmijëve dhe pozitën e tyre në nivel lokal.
Memorandumi është nënshkruar nga kryetari i Komunës së Graçanicës, Novak Zhiviq, dhe drejtori ekzekutiv i OJQ-së “FDMC”, Dejan Radivojeviq.
Përmes bashkëpunimit, palët do të punojnë në rritjen e kapaciteteve të aktorëve përkatës mbi të drejtat e fëmijëve, duke inkurajuar pjesëmarrjen e fëmijëve në proceset e vendimmarrjes, duke ofruar informacione mbi të drejtat e fëmijëve, si dhe aktivitete të tjera që lidhen me zhvillimin e fëmijëve.
Fokusi i veçantë i bashkëpunimit do të jetë në projektin “Përmirësimi i të drejtave të fëmijëve dhe pavarësia e komuniteteve të cenueshme që nuk e përbëjnë shumicën”, i cili zbatohet në partneritet me Zyrën kombëtare “Save the Children Kosova”, me financim nga Agjencia Suedeze për Zhvillim dhe Bashkëpunim Ndërkombëtar (Sida). Projekti bazohet në parimet e të drejtave të fëmijëve, në përputhje me Kartën e BE-së për të Drejtat Fundamentale dhe Konventën e OKB-së për të Drejtat e Fëmijëve (UNCRC), me një fokus të veçantë tek fëmijët që janë më të cenueshëm.
