Pavarësisht përpjekjeve të Komunës së Graçanicës për ta lehtësuar komunikacionin në trafik për qytetarët dhe për ta përmirësuar infrastrukturën duke i shtruar rrugët lokale, veprimet e paskrupullta të individëve po i dëmtojnë përpjekjet e komunës. Rasti më i fundit është në Çagllavicë, ku, pasi Komuna e Graçanicës shtroi rrugën “Giginu”, individët i vendosën vullnetarisht barrierat metalike në rrugë, duke dëmtuar rrjetin e furnizimit me ujë.
Punëtorët e Ujësjellësit dhe Drejtorisë Komunale të Shërbimeve Publike morën informacion se kishte një defekt në rrjetin e furnizimit me ujë në Çagllavicë. Pas mbërritjes në vendngjarje, u regjistrua se mosfunksionimi i rrjetit të furnizimit me ujë ndodhi kur individë vendosën pengesa metalike, të ashtuquajturat “policë të shtruar”, në rrugë, të cilat rezultuan në dëmtime të rrjetit të furnizimit me ujë.
Punëtorët e Ujësjellësit e kanë filluar zgjidhjen e problemit, gjë që do të kërkojë prishjen e asfaltit që u shtrua vetëm pak ditë më parë.
Komuna e Graçanicës, kryesisht Drejtoria Komunale e Urbanizmit dhe Planifikimit Hapësinor, si dhe Drejtoria Komunale e Shërbimeve Publike dhe Situatave Emergjente, e konsiderojnë këtë sjellje të individëve të papranueshme dhe u bëjnë thirrje të gjithë qytetarëve që të mos përfshihen në veprime të këtilla dhe të ngjashme me iniciativën e tyre.
“U bëjmë thirrje të gjithë qytetarëve që ta trajtojnë pronën publike me përgjegjësi dhe u rikujtojmë atyre se prona publike është pronë e të gjithë neve dhe se duhet të bëjmë përpjekje të përbashkëta për ta ruajtur atë. E dënojmë ashpër këtë sjellje të individëve të papërgjegjshëm, sepse dëmton përpjekjet e Komunës së Graçanicës për ta bërë jetën më të mirë për qytetarët e saj”.
Ju kujtojmë se në territorin e Komunës së Graçanicës, asfaltimi i rrugëve lokale është duke u zhvilluar bazuar në një projekt afatgjatë.
