Nga 01 janari 2014 deri më 10 shkurt 2015 në Institutin Kombëtar të Shëndetësisë Publike janë raportuar gjithsej 206 raste të tularemisë. Ky numër, krahasuar me vitin 2013, tregon për rritjen e numrit të rasteve të kësaj sëmundjeve. Deri sot nuk është raportuar asnjë rast vdekjeprurës në tularemia.
Rastet rezultuara pozitive me numër më të lartë janë kryesisht të pjesës qendrore dhe lindore të Kosovës, ndërsa në pjesët e tjera të Kosovës është regjistruar një numër më i ulët i rasteve. Komunat me sëmundshmëri më të lartë janë Vushtrria, Obiliqi dhe Skenderaj, ndërsa komuna e Prizrenit dhe të Suharekës janë komunat më numër më të vogël të rasteve të raportuara.
Rruga e përhapjes së sëmundjes është uji burimor i puseve, ushqimi i ruajtur në mënyrë jo adekuate, si dhe kontakti me produkte të kontaminuara, andaj luten qytetarët të kenë kujdes nga këto rrugë të përhapjes së kësaj sëmundjeje. Pastrimi dhe dezinfektimi janë masat e nevojshme për parandalimin e paraqitjes dhe përhapjes së sëmundjeve.
Masat parandaluese dhe kundërepidemike të cilat duhet t’i ndërmerr çdo komunë (qytet dhe fshat) janë: sigurimi i ujit të pijshëm higjienik, mënjanimi i organizuar i hedhurinave (larg vendbanimit), ushqimi dhe uji duhet të izolohen dhe të ruhen në mënyrë që të pamundësohet qasja e brejtësve dhe insekteve, përdorimi periodik i insekticideve që asgjasojnë insektet.
Dezinfektimi i ujit me klor në përqindrimet standarde duhet të aplikohet në sistemet e shpërndarjes së ujit.
Bakteria F. tularensis mund të transmetohet përmes ajrit që përmban këtë baktere, kontakt me produktet e kafshëve të infektuara dhe përdorimin e ujit të ndotur dhe ushqimit apo kontakti me tokë të kontaminuar.
F. tularensis mbijeton për periudha të gjata në ujë, baltë dhe trupa të kafshëve dhe mbijetesa e saj kushtëzohet me temperaturat më të ulëta. Kashta e bagëtive të kontaminuara nga jashtëqitjet e brejtëse të infektuar mund të aerosolizohet gjatë aktiviteteve bujqësore dhe të shkaktojë shpërthime të sëmundjeve të njeriu.
Situata epidemiologjike është në kontrollë të vazhdueshme nga ekipet kujdestare të këtij Instituti dhe çdo ndryshim i situatës në terren do të pasojë me rekomandime të reja.
Komiteti për parandalimin dhe luftimin e sëmundjeve ngjitëse në Ministrinë e Shëndetësisë në Kosovë i ka informuar organët komunale për shpalljen e epidemisë së tularemisë në Kosovë dhe i ka aktivizuar të gjitha ekipet e terrenit në parandalimin e rasteve të reja të sëmundjes.
