Shtabi i Krizave i Komunës së Graçanicës njofton opinionin se nga sot hyjnë në fuqi masat e reja anti-covid. Ora policore është nga mesnata deri në orën 05:00 të mëngjesit, ndërsa puna e lokaleve është e kufizuar deri në orën 23:00 (muzika deri në orën 22:00).
Të gjithë punonjësit e institucioneve publike, ndërmarrjeve publike qendrore e lokale, të bizneseve private duhet ta posedojnë certifikatën e dy dozave të vaksinës ose vërtetimin nga mjeku specialist se kanë kundërindikacione dhe për këtë arsye janë të përjashtuar nga vaksinimi dhe një test PCR negativ jo më i vjetër se një javë.
Punëdhënësit publik e privat, si dhe subjektet tjera obligohen që mbështetur në nevojat dhe natyrën e punës së tyre, të identifikojnë dhe të përcaktojnë stafin esencial, si dhe të organizojnë punën vetëm me këtë staf, ndërsa punëtorët që nuk janë staf esencial lejohen që detyrat e punës t’i kryejnë nga shtëpia.
Mbajtja e maskës është e detyrueshme në të gjitha hapësirat e mbyllura.
Përfituesit e programeve sociale dhe pensionale janë ende të përjashtuar nga raportimi i rregulltë deri në marrjen e një vendimi të ri.
Ndalimi i hyrjes në qendrat tregtare vazhdon të zbatohet për personat e pavaksinuar, ndërsa taxi-transportuesit lejohen të marrin maksimum dy persona në automjet.
Kinematë, teatrot, qendrat rinore dhe institucionet tjera të ngjashme lejohen të punojnë duke shfrytëzuar 50 % të kapacitetit të hapësirës. E njëjta përqindje vlen edhe për organizimin e ceremonive fetare.
Sipas masave të reja, organizimi i ngjarjeve dhe trajnimeve sportive lejohet vetëm në përputhje me rekomandimet e federatave sportive dhe organizatave ndërkombëtare, në hapësira të mbyllura me 10 % të shikuesve dhe në hapësira të hapura deri në 30 %, duke respektuar distancën dhe masat e tjera mbrojtëse.
Qendrat e fitnesit dhe palestrat lejohen të punojnë.
Klubeve të natës iu ndalohet ende veprimtaria. Ndalimi vazhdon të zbatohet edhe për organizimin e koncerteve, festivaleve, festimeve familjare dhe dasmave.
Hyrja në Kosovë është e mundur me dy doza të vaksinës ose një dozë së bashku me testin PCR jo më të vjetër se 48 orë. Në Kosovë mund të hyjnë edhe pasagjerët që kanë si dëshmi një çertifikatë që e kanë kaluar Covid-in në 90 ditët e fundit (test RT-PCR pozitiv i lëshuar 21-90 ditët e fundit). Nga këto vendime përjashtohen qytetarët me dokumente të Kosovës që do të lejohen të hyjnë në Kosovë, por me certifikatë karantine 7-ditore.
Vendimin e plotë për masat e reja anti-covid mund ta lexoni këtu.
