Mbledhja u kryesua nga Vladeta Kostiq, ku morën pjesë 18 këshilltarë dhe kryetari i komunës, Branimir Stojanoviq. Rendi i propozuar i ditës është plotësuar edhe me një pikë shtesë.
Pas miratimit të pikës së parë të rendit të ditës, përkatësisht miratimit të procesverbalit nga vazhdimi i seancës inauguruese, të mbajtur më 27. 12. 2013, dhe procesverbalit nga mbledhja e parë e rregulltë e mbajtur më 10 janar 2014, janë shqyrtuar edhe pikat që kanë të bëjnë me raportin financiar për vitin 2013, rritjen e buxhetit nga të ardhurat vetanake për vitin 2013, si dhe transferimin e mjeteve nga viti 2013 në vitin 2014. Këto pika të rendit të ditës janë aprovuar njëzëri.
Pika e 5 – të e rendit të ditës kishte të bëntë me propozimin për ndryshimin e destinimit të objektit sportiv në një hapësirë afariste. Arsyeja për shqyrtimin e këtij propozimi ishte ekzistimi i problemit me punëkryesit e punimeve, si dhe me realizimin e projektit deri në fund, përkatësisht përfundimit të punimeve. Ndryshimi i destinimit të këtij objekti do të sjellë përmirësime në jetën e komunitetit lokal. Pika u miratua pas një diskutimi të gjatë, ku 13 këshilltarë votuan pro, ndërsa 5 abstenuan.
Njëzëri u miratua edhe pika e gjashtë, shtatë dhe tetë në lidhje me zvogëlimin e lartësisë së qirasë për objektet afariste që janë në pronësi të komunës së Graçanicës, pastaj ndryshimi i vendimit për ndryshimin e taksës në Rregulloren mbi taksat, tarifat dhe gjobat komunale të Departamentit të shërbimeve publike, bujqësisë, pylltarisë dhe zhvillimit rural, si dhe shlyerja e borxheve për qiranë e hapësirave afariste në pronësi të komunës së Graçanicës.
Pika e nëntë gjithashtu është miratuar njëzëri dhe ka të bëjë me vendimin për dhënien e hapësirës afariste në përdorim organizatave me interes të përgjithshëm.
Për shkak të miratimit të pikës së dhjetë të rendit të ditës, përkatësisht propozim-vendimit për shfuqizimin e Vendimit për hartimin e planeve urbanistike dhe rregulluese dhe dokumentacionit jo të plotë, pika e 13-të e rendit të ditës u refuzua, e cila ka të bëjë me shqyrtimin dhe miratimin e shndërrimit të tokës bujqësore në tokë ndërtimore, përkatësisht me kërkesat e parashtruara nga Bujar Hasani ZK Çagllavicë dhe Dibra Selimi ZK Çagllavicë .
Rregullorja për ndarjen e bursave për studentët nga territori i komunës së Graçanicës u miratua njëzëri, ndërsa neni 9 e kësaj rregulloreje u plotësua.
Në këtë mbledhje u miratua edhe pika që ka të bëjë me formimin e Komitetit për komunitete.
Rendi i ditës është plotësuar me një pikë të re lidhur me formimin e Bordit organizativ me rastin e shënimit të 140 vjetorit të punës së Sh.F. „Kralj Milutin“ në Graçanicë. Pika u miratua, por është vendosur se bordi ekzistues mund të zgjerohet.
Nën pikën „Të ndryshme“, këshilltari nga radhet e grupit të këshilltarëve „ Aleanca e Serbëve të Kosovës-Vidovdan“, Goran Laziq, kërkoi video-xhirimet nga mbledhja, si dhe kopjet e të gjitha vendimeve, si dhe kartën e identifikimit për të cilën do ta dorëzojë kërkesën në formë të shkruar. Në këtë pikë është diskutuar edhe për planin urbano-rregullues.
U mbajt mbledhja e dytë e rregulltë e Kuvendit Komunal të Graçanicës, ku ndër të tjera, është miratuar raporti vjetor financiar për vitin 2013, si dhe vendimi për ndryshimin e destinimit të objektit sportiv në një hapësirë afariste, ndërsa pika e 13 – të e rendit të ditës – shqyrtimi dhe miratimi i shndëërimit të tokës bujqësore në tokë ndërtimore është refuzuar njëzëri.
