Skuadra e Graçanicës e fitoi turneun e basketbollit 3×3, i cili u mbajt dy ditët e kaluara në Llapllasellë si pjesë e programit “Vera kulturore e argëtuese 2024 – Ditët e Graçanicës”.
Në mesin e dhjetë skuadrave që morën pjesë në turneun e dytë të basketbollit 3×3 këtë vit, vendin e dytë e fitoi skuadra e Partizanit, ndërsa vendin e tretë skuadra e Shillovës.
Në turneun e basketbollit 3×3, i cili u mbajt nën patronatin e Komunës së Graçanicës dhe në organizimin e OJQ-së “CSD” dhe 12 organizatave dhe shoqatave, për fituesit u ndanë shpërblimet në të holla, kupat dhe medaljet.
Duke i uruar fituesit për suksesin e tyre dhe duke i falënderuar të gjitha skuadrat që morën pjesë në turne, drejtori i Drejtorisë Komunale për Sport dhe Rini, Dushan Cvejiq, tha se turneu u zhvillua në një atmosferë sportive dhe të ndershme, që ishte edhe qëllimi i tij.
“Jemi të kënaqur që për herë të dytë organizuam një ngjarje të bukur sportive që mblodhi adhurues të basketbollit të gjeneratave të ndryshme, jo vetëm nga Komuna e Graçanicës, por edhe nga pjesët tjera të Kosovës. Gjatë turneut dyditor, ne krijuam miqësi të reja, treguam rëndësinë e sportit dhe dëshmuam përkushtimin e Komunës së Graçanicës dhe Drejtorisë Komunale për Rini dhe Sport, sa i përket kulturës dhe zhvillimit sportiv. Ky turne po mbahet për të dytin vit radhazi dhe besoj se vitin e ardhshëm do të shihemi në të njëjtin vend në numër edhe më të madh”, tha Cvejiq.
Ndeshjet e turneut të basketbollit 3×3 janë luajtur dy ditët e kaluara në Sallën sportive në Llapllasellë.
