Në Shtëpinë e kulturës në Graçanicë dje u mbajt diskutimi i fundit publik i planifikuar për buxhetin e Komunës së Graçanicës për vitin e ardhshëm për banorët e Graçanicës, Badovcit të Ri, Sushicës dhe Kishnicës.
Buxhetin e ka prezantuar drejtori i Buxhetit dhe Financave, Sllavisha Niçiq.
Banorët e pranishëm fillimisht thanë se ishin shumë të zhgënjyer që në diskutimin publik morën pjesë një numër shumë i vogël i qytetarëve, madje edhe përfaqësuesit e Këshillave lokale, edhe pse Komuna e Graçanicës ka publikuar me kohë Kalendarin e diskutimeve të planifikuara të buxhetit 14 ditë para diskutimit të parë, ku do të dëgjoheshin propozimet dhe sugjerimet, mbi të gjitha për projektet kapitale, të cilat duhet ta lehtësojnë dhe përmirësojnë jetën e banorëve të komunës sonë.
I pari foli banori i Graçanicës, Ljubomir Maksimoviq, i cili tha se komuna në të ardhmen duhet t’i përkushtohet më shumë problemit të papunësisë. Ai po ashtu ka kërkuar që përfaqësuesit e komunës të ushtrojnë presion mbi KEK-un që sa më shpejt të ndërrohen shtyllat e dëmtuara elektrike dhe konkretisht ka theksuar problemet me izolatorët në rrugën “Stevan Singjelliq”.
Nga përfaqësuesit e Këshillave lokale, i vetmi që mori pjesë në diskutim ishte Alleksandar Todoroviq, i cili kërkoi vazhdimin e rindërtimit të trotuarit dhe rehabilitimin e ndriçimit jashtëfunksional.
Drejtoresha e Urbanizmit, Alleksandra Gjekiq, tha se në Graçanicë ka përfunduar faza e parë e rikonstruktimit të trotuarit në rrugën “Car Llazar” dhe se së shpejti do të fillojë faza e dytë, në gjatësi prej 350 metrash drejt Shtëpisë së kulturës.
Si problem më i madh mjedisor është përmendur djerrina e minierës së Kishnicës. Në atë kuptim u konstatua se është një problem që qeverisja lokale nuk është në gjendje ta zgjidhë vetë dhe se është e nevojshme që ai problem të ngrihet në një nivel më të lartë me ndihmën e organizatave të ndryshme. Gjithashtu është kërkuar angazhim më i madh, edhe në partneritet me donatorët, për ndërtimin e bypass-it rreth Graçanicës.
Alleksandra Markoviq nga Badovci i Ri kërkoi ndërtimin e ambulancës në atë vend, si dhe ndërtimin e shtegut për biçikleta.
Goran Mirkoviq kërkoi ndërtimin e një objekti ndihmës me tualete, rrymë dhe ujë në varrezat në Badovcin e Ri.
Në Komunën e Graçanicës janë mbajtur gjithsej njëmbëdhjetë diskutime publike për buxhetin.
