Zëvendëskryetari i Komunës së Graçanicës, Igor Aritonoviq dhe nënkryetari për Komunitete Leutrim Ajeti, janë takuar sot me përfaqësuesit e Komisionit Qendror të Zgjedhjeve për krijimin e modulit të bashkëpunimit përmes një memorandumi, i cili pritet të nënshkruhet së shpejti.
Parimisht, për përmbajtjen e memorandumit u ra dakord me përfaqësuesit e KQZ-së, i cili do të përcaktojë mbështetjen për Komisionin Komunal të Zgjedhjeve gjatë dhe pas procesit zgjedhor përmes ofrimit të hapësirës së punës në objektet publike si për nevojat e punës ashtu edhe për trajnimin e anëtarëve të Komisionit Komunal të Zgjedhjeve dhe për qëllime të votimit dhe numërimit.
Në kuadër të marrëveshjes është paraparë obligimi i Komunës së Graçanicës si dhe ofrimi i mbështetjes teknike, transporti, kontrolli dhe shpërndarja e materialeve zgjedhore.
Në takimin e zyrtarëve komunalë dhe delegacionit të Komisionit Qendror të Zgjedhjeve, u ra dakord që KQZ-ja ta marrë përgjegjësinë për ruajtjen dhe shfrytëzimin e ambienteve të punës gjatë periudhës së organizimit dhe zbatimit të procesit zgjedhor.
Kontrolli i qendrave të votimit dhe vendndodhjeve të tyre do të jetë në dispozicion të Komunës së Graçanicës.
Memorandumi që Komuna e Graçanicës do ta nënshkruajë së shpejti me Komisionin Qendror të Zgjedhjeve është pjesë e plotësimit të rregullave ligjore për mbështetjen e Komisionit Komunal të Zgjedhjeve në bazë të Ligjit nr. 08/L-228 për zgjedhjet e përgjithshme.
