Shefja e UNMIK-ut në Kosovë, Karolin Zijade, vizitoi sot Komunën e Graçanicës me bashkëpunëtorët e saj, ku u takua me kryetaren e komunës, prof.dr. Ljiljana Shubariq, këshilltarin e kryetares, Sasha Daniq dhe drejtoreshën e Drejtorisë së Urbanizmit, Alleksandra Gjekiq.
Temat kryesore të diskutimit, ndër të tjera, kishin të bënin me vendimin e Qeverisë së Kosovës për ndarjen e 13 hektarëve të pronës komunale në zonën e Graçanicës me qëllim të realizimit të ndërtimit të “Qendrës rezidenciale për autizëm, sindromë daun dhe aftësi të kufizuar për fëmijë, persona të rritur dhe të moshës së shtyrë”.
Kryetarja Shubariq ka ripërsëritur edhe një herë qëndrimin e saj se shprehimisht e kundërshton vendimin e Qeverisë së Kosovës për përvetësimin e pronës komunale, duke theksuar se pritet përfundimi i veprimeve ligjore të Komunës së Graçanicës për këtë çështje. Kryetarja edhe një herë i bëri thirrje UNMIK-ut dhe gjithë komunitetit ndërkombëtar që të përfshihen në zgjidhjen e kësaj çështjeje.
Zijade e ka vizituar Komunën e Graçanicës për të diskutuar me kryetaren e Komunës së Graçanicës, ndër të tjera, për sfidat me të cilat ballafaqohet pushteti lokal dhe qytetarët e tij, në mënyrë që të përmirësohet bashkëpunimi ndërmjet UNMIK-ut dhe Komunës së Graçanicës përmes realizimit të projekteve të reja.
Kryetarja e Komunës së Graçanicës, prof. dr. Ljiljana Shubariqm e falënderoi shefen e UNMIK-ut për projektet që janë realizuar deri më tani dhe ia përcolli shqetësimet e popullatës lidhur me mbylljen e institucioneve të Republikës së Serbisë në territorin e Komunës së Graçanicës. Ajo theksoi se ky vendim i institucioneve në Prishtinë ka sjellë shqëtësim, frikë dhe pasiguri shtesë në të gjitha komunitetet në territorin e Komunës së Graçanicës.
U konstatua se misioni i përbashkët i UNMIK-ut dhe përfaqësuesve të pushtetit lokal është ruajtja e paqes dhe stabilitetit për ta vazhduar zhvillimin dhe forcimin ekonomik të të gjitha komuniteteve.
Pas takimit në ndërtesën e Komunës së Graçanicës, delegacioni i UNMIK-ut dhe Komunës së Graçanicës vizituan zonën e rinovuar të pushimores “Çesma”, ku UNMIK-u financoi pjesën e projektit që i referohet gardhit.
