Në sallën e Komunës së Graçanicës është mbajtur mbledhja e dytë e rregullt e Komitetit për Komunitete, ku ndër të tjera është diskutuar për gjendjen e sigurisë dhe punën e Këshillave lokale.
Informatat për gjendjen e sigurisë në territorin e Komunës së Graçanicës i ka ofruar zyrtarja policore nga Zyra për Komunitete e Stacionit në Graçanicë, Svetllana Kapetanoviq.
“Situata e sigurisë në zonën e përgjegjësisë së Stacionit policor në Graçanicë është në një nivel të kënaqshëm dhe nuk ka pasur probleme të mëdha në krahasim me komunat tjera. Si në fund të vitit të kaluar, ashtu edhe në fillim të këtij viti, kemi një numër të shtuar të rasteve të dhunës në familje”, tha Kapetanoviq.
Anëtarët e komitetit ishin të interesuar për detajet lidhur me të shtënat e fundit në qendër të Graçanicës, ndërsa znj. Kapetanoviq u përgjigj se autori është ndaluar dhe ndjekur penalisht.
Në mbledhje morën pjesë disa anëtarë të Këshillit lokal të Graçanicës, të cilët folën për punën e tyre. Njëri nga anëtarët, Alleksandar Todoroviq, tha se Këshilli lokal është përgjegjës për bashkëpunim me Komunën e Graçanicës dhe paraqet lidhjen e qytetarëve me vetë komunën.
“Qëllimi i Këshillit lokal është t’i dëgjojë problemet, interesat, iniciativat, ankesat e qytetarëve dhe t’ua përcjellë organeve komunale që janë përgjegjëse për zgjidhjen e problemeve të caktuara. Janë nisur shumë iniciativa dhe janë bërë shumë konsultime për drejtori të ndryshme lidhur me projektet e ndryshme infrastrukturore, më së shumti për asfaltimin e rrugëve prioritare”, tha Todoroviq.
Anëtarët e Komitetit për Komunitete e mirëpritën iniciativën që në këto takime të marrin pjesë edhe përfaqësuesit e këshillave lokale, ndërsa anëtari Dejan Jevtiq sugjeroi që në të ardhmen të ftohen edhe përfaqësuesit e sektorit joqeveritar, të cilët mund të kontribuojnë në zgjidhjen e problemeve në komunitet me projekte të ndryshme ose ide.
Në mbledhje ishte i pranishëm edhe kryetari i Shoqatës së Dhuruesve Vullnetarë të Gjakut nga Graçanica, Goran Sllavkoviq, i cili kërkoi ndihmë nga Komiteti për Komunitete dhe Komuna e Graçanicës për gjetjen e hapësirave në të cilat do të funksionojë shoqata.
“Duke marrë parasysh sa japim për të shpëtuar një jetë me çdo dhurim vullnetar gjaku, kërkojmë kushtet më elementare të punës, të marrim një hapësirë me një kompjuter, një vend ku të gjithë ne që dhurojmë rregullisht gjak dhe ata që dëshirojnë për të dhënë gjak mund të takohemi. Ne duam të krijojmë një bazë të dhuruesve vullnetarë të gjakut, sepse në këtë mënyrë do të mund të reagonim menjëherë në rast se dikush ka nevojë urgjente për gjak dhe sigurisht që do të arrinim një bashkëpunim edhe me shoqatat e tjera”, tha Sllavkoviq dhe shtoi se shoqata ka rreth 200 anëtarë të gatshëm për të dhuruar gjak në çdo kohë.
