Kuvendi i Komunës së Graçanicës mbajti mbledhjen e dytë të rregullt, në të cilën u miratua raporti vjetor financiar, ndërsa në rendin e ditës ishin edhe raportet e disa drejtorive.
Mbledhja u drejtua nga kryesuesi Milan Dimitrijeviq, i cili në fillim i njoftoi asamblistët me rendin e ditës. Më pas është miratuar procesverbali nga mbledhja e parë e rregullt e mbajtur në fund të janarit të këtij viti.
Asamblistët më pas e miratuan Raportin vjetor financiar, të cilin e prezantoi drejtori për Buxhet dhe Financa, Sllavisha Niçiq. Ai tha se buxheti fillestar ishte 8.767.000 euro, ndërsa buxheti final 10.171.000 euro, ku 9.318.000 euro janë shpenzuar për paga dhe mëditje, mallra dhe shërbime, shpenzime komunale dhe kapitale, transfere dhe subvencione.
Pastaj është diskutuar dhe më pas është miratuar propozimi i Marrëveshjes kornizë për bashkëpunim ndërkomunal shumëfunksional ndërmjet gjashtë komunave, përkatësisht: Graçanicës, Prishtinës, Lipjanit, Obiliqit, Fushë Kosovës dhe Podujevës, të gjitha me qëllim të rregullimit të problemeve të përbashkëta të qytetarëve dhe të komunave, si qentë endacakë, deponitë ilegale, infrastruktura e të ngjashme. Pikën e ka shpjeguar nënkryetari i komunës për komunitete, Leutrim Ajeti.
Është miratuar edhe Raporti vjetor i punës së Drejtorisë së Arsimit dhe Kulturës për vitin 2023, të cilin e prezantoi drejtoresha Brankica Niqiq. Ajo i njoftoi asamblistët edhe për përfundimin e gjysmëvjetorit të parë dhe fillimin e gjysmëvjetorit të dytë të vitit shkollor 2023/2024.
“Ne merremi me aktivitete që kanë të bëjnë me mirëmbajtjen dhe përmirësimin e procesit arsimor në shkollat parashkollore, fillore dhe të mesme. Çdo vit ne investojmë në mallra dhe shërbime, projekte kapitale dhe shërbime komunale, ku përveç kësaj edhe ofrojmë mbështetje të caktuar logjistike për këto institucione, organizata sportive dhe qendra kulturore”, tha Niqiq.
Asamblistët miratuan edhe Raportin vjetor të punës së Drejtorisë për Zhvillim Ekonomik dhe Integrime, të cilin e sqaroi drejtori Nebojsha Millovanoviq.
Është miratuar edhe vendimi preliminar për fillimin e procedurës për dhënien e pronës së paluajtshme të komunës në shfrytëzim afatshkurtër, i cili i referohet lokaleve në Suhadoll, me propozim të kryetares së komunës së Graçanicës, Ljiljana Shubariq.
Tek pika “të ndryshme”, drejtoresha e Drejtorisë Komunale për Urbanizëm dhe Planifikim, Alleksandra Gjekiq, iu përgjigj pyetjeve të asamblistëve për realizimin e projekteve të ndryshme infrastrukturore.
