Në fillim të mbledhjes anëtarët e miratuan procesverbalin nga mbledhja e katërt e rregullt, ku pastaj njëzëri i miratuan edhe të gjitha pikat e tjera të rendit të ditës, të cilat edhe një herë do të shqyrtohen në mbledhjen e dytë të jashtëzakonshme të Kuvendit komunal.
Me propozim të kryetarit të Komunës së Graçanicës, Vladeta Kostiq, me qëllim të funkcionimit më të mirë është aprovuar propozimi për ndarjen e tri drejtorive komunale. Ndryshimi më i madh u bë në Drejtorinë e urbanizmit, planifikimit, kadastrit dhe mbrojtjes së mjedisit, e cila do të ndahet në Drejtorinë e kadastrit dhe në Drejtorinë e urbanizmit, planifikimit dhe mbrojtjes së mjedisit. Nga Drejtoria e arsimit, kulturës, rinisë dhe sportit do të formohet Drejtoria e arsimit dhe kulturës dhe Drejtoria e rinisë dhe sportit, ndërsa nga Drejtoria e shërbimeve publike, bujqësisë, pylltarisë dhe situatave emergjente do të formohet Drejtoria e bujqësisë dhe pylltarisë dhe Drejtoria e shërbimeve publike dhe situatave emergjente.
Sa i përket ndryshimeve të Statutit, këshilltarët gjithashtu e miratuan propozimin për ndryshimin e Ditës së komunës dhe Rregulloren për shënimin e saj. Për Ditën e Komunës së Graçanicës është propozuar data 21 shtator (Zonja e Vogël), ku me Rregullorjen për shënimin e saj parashihet një numër i madh i ngjarjeve që do të organizohen një javë para Ditës së Komunës së Graçanicës.
Është përsëritur shqyrtimi dhe miratimi i propozimit për dhënien e pronës komunale në shfrytëzim për nevojat e ndërtimit të Shtëpisë së gazetarëve në Graçanicë.
Njëzëri u miratua edhe raporti gjashtëmujor financiar për vitin 2015, raporti i punës së Drejtorisë së arsimit, kulturës, rinisë dhe sportit, raporti i punës së Drejtorisë për zhvillimin ekonomik dhe integrime.
Nën pikën “të ndryshme”, përfaqësuesit e opozitës ua adresuan disa pyetje lidhur me inspeksionin dhe kadastrën drejtorive përkatëse. Këshilltarja Snezhana Jovanoviq kërkoi nga Kuvendi që ta mbështesë propozimin për gërmimin e dy puseve për banorët e dy ndërtesave në Dobrotin me qëllim të zgjidhjes së problemit të furnizimit me ujë, ndërsa Ivica Miciq nga Sushica e paraqiti kërkesën për zgjerimin e varrezave lokale.
Të gjitha pikat e rendit të ditës dhe propozimet do të shqyrtohen përsëri në mbledhjen e dytë të jashtëzakonshme të Kuvendit komunal të Graçanicës.
Në sallën e Kuvendit komunal të Graçanicës u mbajt mbledhja e dytë e jashtëzakonshme e Komitetit për Politikë dhe Financa, në të cilën anëtarët miratuan propozimet për ndryshimin e Statutit komunal dhe raportet gjashtëmujore të disa departamenteve.
