Në objektin e Komunës së Graçanicës u mbajt mbledhja e shtatë e rregullt e Kuvendit të Komunës së Graçanicës, në të cilën janë shqyrtuar disa raporte.
Kryesuesi Millan Dimitrijeviq i njoftoi asamblistët me rendin e ditës, ku pastaj u miratua procesverbali nga mbledhja e gjashtë e rregullt.
Asamblistët miratuan raportin e Këshillt Komunal për Siguri në Bashkësi për periudhën janar-qershor 2024, në të cilin u mbajtën tri mbledhje të kryesuara nga kryetarja e komunës Ljiljana Shubariq.
Është diskutuar dhe miratuar raporti financiar gjashtëmujor i prezantuar nga drejtori i Buxhetit dhe Financave, Sllavisha Niçiq. Sipas tij, për gjashtë muaj janë ndarë mjete në vlerë prej 6,659,080 euro ose 65,98% nga buxheti i përgjithshëm dhe janë shpenzuar 4,056,825 euro ose 60,92% nga mjetet e ndara. Të hyrat vetanake janë realizuar në vlerë prej 1,267,805 euro ose 55,36% e të hyrave vetanake të planifikuara për vitin 2024.
Asamblistët e kanë shqyrtuar Raportin e Auditorit të përgjithshëm për vitin 2023 dhe Planin e veprimit për zbatimin e rekomandimeve.
Është diskutuar dhe miratuar raporti vjetor i punës për vitin 2023 i Drejtorisë për Planifikim, Urbanizëm dhe Mbrojtjen e Mjedisit, të cilin e shpjegoi drejtoresha Alleksandra Gjekiq.
Asamblistët e miratuan Planin e veprimit për procesin transparent të buxhetimit për vitin 2025, në bazë të të cilit janë planifikuar 11 diskutime me qytetarë dhe organizata e shoqata të ndryshme. Pjesë e procesit do të jetë edhe fushata “Ju vendosni”, përmes së cilës qytetarët do të mund t’i nxjerrin në pah problemet që duhet të zgjidhen me mjetet e komunës, si dhe t’i japin vërejtjet dhe sugjerimet e tyre.
Në mbledhje janë ofruar informacionet për përfundimin e vitit shkollor 2023/24 nga drejtoresha e Arsimit dhe Kulturës, Brankica Niqiq. U tha se mësimi u realizua me sukses, sipas planit dhe programit të paracaktuar si dhe se Drejtoria e Arsimit dhe Kulturës, sipas mundësive të saj, u ka ofruar institucioneve arsimore të gjitha llojet e mbështetjes gjatë gjithë vitit dhe në këtë mënyrë kontribuoi në përmirësimin e arsimit dhe edukimit.
Para mbledhjes së KK të Graçanicës është mbajtur mbledhja e shtatë e rregullt e Komitetit për Politikë dhe Financa.
