Në qendër të Graçanicës u mbajt Panairi i parë i traditës dhe kulturës dhe Panairi i gjashtë ndërkomunal i mjaltit, ku prodhuesit lokalë i promovuan dhe shitën prodhimet e tyre. Qëllimi ishte promovimi i traditës, kulturës, turizmit dhe ekonomisë, tha kryetarja e Komunës së Graçanicës, Ljiljana Shubariq pas vizitës së stendave.
Këto panaire u mbajtën në kuadër të shënimit të festës së Fjetjes së Hyjlindëses, festës së Manastririt Graçanica dhe Graçanicës.
Panairi i parë i kulturës dhe traditës u organizua nga Organizata turistike e Graçanicës në kuadër të programit “Ditët e Graçanicës 2024 – Verë argëtuese e kulturore 2024”, i cili zbatohet nga CSD në bashkëpunim me 12 organizata dhe shoqata të tjera. Panairi u përkrah nga Komuna e Graçanicës, CDF-ja dhe USAID-i.
Panairi mblodhi së bashku dhjetëra prodhues dhe shoqata lokale nga e gjithë Kosova, të cilët patën mundësinë t’i ekspozojnë dhe t’i shesin prodhimet vendore. Vizitorë të shumtë mund të shijonin, provonin dhe blinin produkte të ndryshme – nga byrekët, ëmbëlsirat, mishi i tharë dhe produktet e qumështit, ëmbëlsirat e deri te likeret vendase, verë, raki, si dhe suvenire, bizhuteri dhe punime të tjera artizanale.
Njëkohësisht, në oborrin në qendër të Graçanicës u mbajt Panairi i gjashtë ndërkomunal i mjaltit dhe produkteve të bletës, i organizuar nga NP “Nukleus” nga Graçanica.
Të dy panairet i vizitoi kryetarja e Komunës së Graçanicës, prof. dr. Ljiljana Shubariq, e shoqëruar nga bashkëpunëtorët e saj. Të pranishëm ishin edhe përfaqësuesit e CDF-së dhe USAID-it, të udhëhequr nga drejtoresha e Sektorit të biznesit, Eileen Devitt.
Kryetarja Shubariq theksoi se qëllimi është të prezantohet veçantia, pasuria, cilësia dhe diversiteti i produkteve tradicionale vendase përmes kombinimit të traditës, kulturës dhe gastronomisë autentike, por edhe promovimi i ekonomisë dhe turizmit.
“Çdo vit ne organizojmë ‘’Graçaniçko prelo’’ për prodhuesit tanë vendorë dhe këtë vit na erdhi ideja që ta zgjerojmë ngjarjen dhe t’i lidhim njerëzit nga të gjitha anët e Kosovës. Ne mblodhëm rreth 60 ekspozues në Panairin e parë të traditës dhe kulturës dhe në Panairin e gjashtë të mjaltit, dhe siç mund ta shihni, Graçanica është gjallë. Synimi dhe qëllimi ynë është që kjo të bëhet traditë që t’i mbledhim prodhuesit tanë në një vend për t’i ekspozuar produktet e tyre, për të shitur diçka dhe për të shkëmbyer përvoja”, tha kryetarja Shubariq.
Të gjithë banorëve të Graçanicës dhe klerit të Kishës Ortodokse Serbe, kryetarja Shubariq ua ka uruar festën e fshatit dhe festën e manastirin me dëshirën që festën ta festojnë në paqe, shëndet dhe gëzim.
