Komuna e Graçanicës dhe Qendra Rajonale e Inovacionit sh.p.k. nga Zubin Potoku kanë nënshkruar Memorandum të bashkëpunimit me qëllim të përmirësimit të zhvillimit të të rinjve, inovacionit dhe sipërmarrjes në territorin e komunës.
Me këtë dokument vendoset partneriteti që synon zbatimin e programeve edukative, punëtorive, iniciativave të startup-eve dhe aktiviteteve të tjera që kontribuojnë në forcimin e kapaciteteve të të rinjve dhe zhvillimin e komunitetit lokal.
Memorandumi është nënshkruar nga kryetari i Komunës së Graçanicës, Novak Zhiviq dhe përfaqësuesi i Qendrës Rajonale të Inovacionit nga Zubin Potoku, Millan Vuçiniq.
Qendra Rajonale e Inovacionit, në përputhje me kapacitetet e saj, do të zbatojë trajnime në fushën e teknologjive të informacionit, inovacionit dhe sipërmarrjes, do të ofrojë mbështetje mentorimi dhe do të organizojë ngjarje me rëndësi për të rinjtë në Komunën e Graçanicës. Nga ana tjetër, Komuna e Graçanicës do të sigurojë kushte të përshtatshme hapësinore dhe logjistike për zbatimin e aktiviteteve të planifikuara.
Memorandumi përfaqëson bazën për bashkëpunim vullnetar dhe synon të krijojë një mjedis inkurajues për të rinjtë, të zhvillojë ide të reja dhe ta përmirësojë cilësinë e jetës në komunitet.
Bashkëpunimi është parashikuar për një periudhë njëvjeçare, me mundësinë e zgjatjes dhe zhvillimit të mëtejshëm të iniciativave të përbashkëta.
